La Jonta provinziela ne scurtà nia tla prioriteies dl bilanz
USP – Sanità y soziel, furmazion y cultura, economia y lëur: chisc ie i ciamps prioriteies pra chëi che la Jonta provinziela ne scurta nia tl proscimo bilanz provinziel. „l ie ciamps fundamentei per l svilup de nosc raion che ti dajon priorità tl finanziamënt“ à dit l presidënt Durnwalder.
L proscimo bilanz provinziel deventerà feter tan grant sciche chël da chëst ann, ma davia che te vel ciamps iel de majeri custimënc, iel n generel debujën de scurté i capituli de feter 2%. “Nia scurté, ne uel la Jonta provinziela ti ciamps strategics” à dit Luis Durnwalder (NCUEI) ai 10 de utober, riesc do la senteda dla Jonta. Chisc ciamps che ie unic fai ora reverda la furmazion, l lëur y l’Europa. Nia scurté ne uelen nce no tla cultura, nfati possa la repartizions per la cultura tudëscia, taliana y ladina per l proscimo ann fé cont cun i medemi scioldi sciche chëst ann. L medemo vel nce per i museums y la cura di monumënc culturei.
Nia scurtà ne dëssel nce no tl ciamp soziel, ulache n minova de messëi sparanië 1,44 %, y tl ciamp dla sanità. “Te chisc ciamps auza daniëura l custimënt, ma chësc aumënt ulons curì sparanian tl’aministrazion y sci sons boni de ciafië cun i mesuns dl 2011” à dit l presidënt dla Provinzia. N auter ciamp ulache l ne unirà nia scurtà ie l’energia y l’ega, ulache n uel dantaprima scurté l tëmp per aspité sun cuntribuc per la produzion de energia alternativa. Sëuraprò ne uniral nce nia sparanià pra i chemuns che giaterà inò 500 milion de euro.
Nce l sustëni al’economia ne unirà nia smendrì y ne vën perchël nia tucà dala regula i 2%. “Fajon cont che l Guviern Talian fajerà mo n pachetl contra la crisa che mira a ti dé na sburdla al’economia y l sustëni dl crëscer economich” à dit l presidënt. La Provinzia uel sustenì chisc aiuc.
L medemo finanziamënt sciche chëst ann dëssa nce giapé l’agricultura y lëur tl bosch, l cumerz, l artejanat, la ndustria y l turism. L fond de rotazion per sustenì l’economia dëssa unì ngrandì da 40 a 60 milion de euro. Tl sustëni al’inuvazion vëniel juntà 5 milion de euro.
N cajo particuler ie l frabiché de cuatieres. “Sce tulon ca chël che nes vën de reviers y chël che ne ie nia unì dat ora, ons bele 290 milion de euro a desposizion” à dit Durnwalder. La Jonta provinziela tenirà cont de chisc scioldi zënza junté pro uni ann 140 milion de scioldi frësc. “Tulan ca i 290 milion de euro y juntan mo 20 milion leprò, possel unì realisà plu debota i programs de cuatieres” à dit l presidënt dla Provinzia. Per n auter ann iel bele prugramà de scrì ora lëures de 157 milion per cuatieres soziei. “Chisc scioldi ne vën nia nuzei duc te un n iede, perchël i udons dant te n bilanz per i proscimi trëi ani” à dit Durnwalder.
Ntan chëst’ ena adaterà i assessëures provinziei si capituli aldò dla diretives che ie unides fates ora. L’ena che vën pudëssa bele unì dat pro la pruposta de bilanz provinziel per l 2012.
as
Galaria dales fotografies
Landeshauptmann Durnwalder zum Haushalt 2012
- Scarica il file audio 787 kb
