Aministraziun | 10.10.2011 | 16:35

Jonta vën ancontra ala families cun l IRPEF, ala firmes cun l IRAP

USP – La njonta regiunela IRPEF unirà tëuta demez defin per n davani nchin a 15.000 euro. A families cun mutons ti uniral sëuraprò mo unì ancontra. La Jonta provinziela ie (NCUEI) ai 10 de utober nce stata a una de ulëi mantenì l 2,98% per l IRAP y de jì jù a 2,5% per firmes che ie de ejëmpl.

Autramënter permez a chëst ann, dëssa n auter ann unì auzà la sëida per chëi che ne muessa nia paië l IRPEF. Nia plu nchin a 12.500 ma per n davani nchin a 15.000 euro dëssel tumé demez la njonta regiunela sun chësta chëuta. Per n davani sëura la sëida messeran paië 0,9% leprò, che ie mo for de manco che l mascim dl 1,4%. Chësc pruvedimënt pëiserà cun 20 milion de euro sun la casses provinzieles, tenian cont nce dl’agevolazion per families.

Families cun n davani nchin a 28.000 euro al ann, puderà tré jù 252 euro (126 euro sce l mut se stiza finanzieramënter me 50% sun la familia). L sistem de unì ancontra ala families tën cont dl davani y dla cumpëida de mutons. Sëuraprò ala prima categuria sota i 28.000 euro, saral nce na segonda nchin a 56.000 euro: sce l ie tlo amaca doi mutons, toma la njonta IRPEF demez defin. Sce l ie n sëul mut o muta, iel me da paië la njonta IRPEF sun la pert sëura i 28.000 euro.

N cont dl IRAP, che deberieda cun la njonta IRPEF fej ora feter l 8 % dla ntredes, ie la Jonta provinziela bela stata a una. „Tlo mueven dal’idea de unì anconta ala firmes che ie de ejëmpl, che fossa chëles che aumënta la stieres dl 10%, l valor de produzion dl 5% o i nvestimënc tl’inuvazion dl 10%“ à dit Durnwalder.

La Jonta provinziela vëija danora l IRAP a 2,98% per duta la firmes ora dla banches y assegurazions che muessa paië 4,2%. Firmes che ie de ejëmpl dëssa me paië 2,5%. L proscimo var sarà chël de udëi cie che vën azetà dai mprenditëures.

as