Aministraziun | 17.10.2011 | 14:52

Jonta provinziela juda i chemuns a fé l ultimo toch dl’internet a slune

USP - Aldò dla normes europees possa la Provinzia fé i culegamënc dl internet a slune nchin ala zentrela de uni chemun, ma nia nchin pra la cëses. Chësc ultimo toch dëssa perchël sëurantò i chemuns. La Jonta provinziela ie (NCUEI) ai 17 de utober stata a una de ti judé ai chemuns che ne ie nia boni de fé chisc lëures te curt tëmp.

La Provinzia de Bulsan à udù dant de fé 855 chilometri de culegamënc cun fibres otiches cun n nvestimënt de feter 50 milion de euro per l internet a slune: 450 chilometri (53%) ie bele anjeniei, 280 chilometri (33%) ie iust tl lëur y i autri 125 chilometri (14%) ie bele proietei. La Jonta provinziela à (NCUEI) ai 17 de utober, sun pruposta dl assessëur Mussner, dat pro de scrì ora 7 lëures nueves, chisc reverda Ciastel-Urtijëi, Ciastel-Sëuc-Völs, Bulsan-Jenesien, Mühlbach-Rodeneck, Sand in Taufers-Mühlwald cun i culegamënc prinzipei a Auer y chëi pra la stradon tl chemun de Villanders.

Acioche i zitadins posse se nuzé di culegamënc a slune iel debujën de taché adum la zentreles te uni chemun cun la cëses. Chësc lëur ne possa nia fé la Provinzia, ma i chemuns. “Nchin ala fin dl 2013 ons prugramà de finè la rë provinziela, nchin ntlëuta fossel drët che nce i chemuns ebe fat i ultimi toc ti luesc nstësc” à dit l presidënt Durnwalder, “perchël ulons abiné soluzions da ti judé ai chemuns che ne ie nia boni de fé chisc lëures”. Riesc do la senteda dla Jonta provinziela à l presidënt rujenà de n fond de rotazion ora de chël che l pudëssa unì mprestà scioldi ai chemuns. “I chemuns possa nce se damandé velch per i culegamënc internet y nscì pudëssi te 6 o 7 ani paië ju si nvestimënc” à dit Durnwalder. Per chemuns puech svilupei an te Jonta provinziela pensà de judé pea diretamënter tl finanziamënt cun n cuntribut. Deberieda cun l’Associazion di chemuns cialeran de abiné na soluzion acioche i chemuns possa fé l ultimo toch di culegamënc de fibres otiches nchin pra la cëses y nscì possa la rë provinziela dl’internet a slune posse arjonjer la cëses di zitadins.