Frabiché | 19.10.2011 | 18:27

Giaurì la scola prufesciunela per la gastronomia a Persenon

USP – A Persenon iel (NCUEI) ai 19 de utober unì giaurì ufizialmënter l toch nuef dla scola prufesciunela per la gastronomia y alimenteres „Emma Hellensteiner“. L frabicat cun de ndut feter 10.000 metri cubich ie unì sëurandat ala scola dal presidënt Durnwalder cun i assessëures Mussner y Berger.

Davia che for plu jëuni à tëut la streda de na furmazion tla gastronomia iel stat debujën de ngrandì la scola prufesciunela a Persenon. „Se on tëut dant de fé nvestizions per la furmazion de nosc jëuni, perchël iel nce debujën de strutures adatedes per sculeies y nsenianc. Tlo vëniel nsenià ju forzes che garantirà te n daunì che i turisć se n stebe bën tl Südtirol“ à spiegà l presidënt Luis Durnwalder. Sun l ejëmpl de Emma Hellensteiner, pioniera dl turism, ti à nce la Jonta provinziela crëta ai jëuni. „Chësta crëta vëijen ora cun la nvestizion de chësc frabicat“ à dit l assessëur Florian Mussner.

La mpurtanza dl ciamp turistich cun 25.000 stieres à sorissà l assessëur Hans Berger, perchël iel n plajëi che tan de jëuni posse giapé na furmazion te na strutura che tën l var cun i tëmps.

De fauré dl ann passà fovel unì scumencià i lëures. Do ot mënsc oven bele fat su l frabicat cun cater partimënc che taca adum cun la vedla cësa. La tlasses à de gran parëies de scipa. Sëuraprò a 10 tlasses normales iel nce unì fat cater tlasses spezieles y n labor.

Tl vedl frabicat iel unì fat da nuef la bibliotech, l local di nsenianc y i ufizies de aministrazion. La cësa nueva ie culegheda ala vedla cun n frabicat de scipa sun doi partimënc. Tlo iel nce da udëi na gran opra artistica de Thaddäus Salcher da Bula.

L frabicat nuef à na cubatura de 7.800 metri cubich, l toch de culegamënt à 900 metri cubich y la pert che ie unida renuveda reverda 2.200 metri cubich. De ndut iel n custimënt de 4,5 milion de euro.

as

Galaria dales fotografies

I assessëures Mussner y Berger cun l presidënt Drunwalder à sëurandat ufizialmënter l toch nuef dla scola prufescionela per la gastronomia a Persenon .