Museums | 21.10.2011 | 10:55

Gran batadù tl Museum Ladin Ciastel de Tor ai 30 d’otober

USP – Le Museum Ladin stlüj jö la sajun da d’isté cun n gran batadù che gnarà metü a jì en domënia, ai 30 d’otober deborida cun l’Uniun di Stödafüch da San Martin de Tor. Les iscriziuns vëgn tutes sö bele danfora.

Le tornê de batadù scomëncia dales 13.30 cun l’incuntada, l’iscriziun di cartadus y sambëgn inće cun l’estraziun di grups. Dales 14.00 gnaràl metü man da cartè. Les iscriziuns vëgn inće bele tutes sö danfora (telefonn 339/7685970 vigni domisdé).

En domënia ai 30 d’otober pol ćiamò gnì vijité le Museum Ladin y la mostra „Scibla mo n iede – La ferata de Gherdëina danter lecorc y vijions“, daverta por l’ultimo dé ti orars de daurida dl Museum. Dai 19 de novëmber ćina ai 12 de forà sarà spo la mostra da odëi te Sëlva, tl Tublà da Nives.

Le batadù stlüj jö l’ativité dla sajun da d’isté tan bëgn dl Museum Ladin Ćiastel de Tor co inće dl Museum Ladin Ursus ladinicus a San Ćiascian. La sajun da d’invern metarà spo indô man ai 26 de dezëmber.

Museum Ladin Ćiastel de Tor tl web sot a www.museumladin.it

usp

Galaria dales fotografies