Dat pro la lege sun l’imigrazion
USP – “Na lege balanzeda y valiveda ora”: nsci valutea l assessëur provinziel Roberto Bizzo la lege sun la ntegrazion de zitadins fulestieres data pro te Cunsëi provinziel. Aldò dl assessëur provinziel iel la imigrazion n fenomenn che n muessa aministré acioche l devënta na ucajion y nia me n problem. De chësc viers iel cun la lege nueva unì fat n var mpurtant.
L pruvedimënt dat pro te Cunsëi provinziel tën cont dla normatives europees y naziuneles y ie tl medemo mumënt fundamënta per l’armunisazion de de plu leges provinzieles. La lege ie unida fata do l prinzip de judé y damandé, valivan ora dërc y duvieres. La ulentà ie de cumpanië i imigrei tl’ntegrazion, purté inant la cunvivënza de pesc y fé crëscer la cultura dl respet, iust te n raion che se fej inuem per l’ancunteda dla cultures.
I zitadins fulestieres ie bele deventei na pert mpurtanta dl’economia dl Südtirol, davia che l ie bele 25.000 lauranc imigrei che à viv tla provinzia de Bulsan. “Ëi ne ti tol nia l lëur a chëi da tlo, ma i ie debujën ti ciamps prinzipei de nosta economia. I imigrei fej produzion y paia chëutes te na majera mesura permez a tant che costa chël che i giapa. Ëi paia ite la pension, cëla for de plu sun nosta jënt de tëmp y nosc mutons. Sota la rissa vëniel ora n resultat positif per nosta provinzia” à dit Bizzo.
Sëuraprò a chësc pont de ududa economich, iel nce da tenì cont dla pert soziela. “I fulestieres se merita respet sciche persones y zitadins – dij l assessëur – ma chësc vel nce per nosta tradizions, nosta cultura, nosta religion. L prim strumënt per mparé a se cunëscer l’un cun l’auter ie la promozion de rujeneda che lascia pro n cuntat da uni di: tl lëur, te scola, tl’aministrazion publica. Nce per chësta rejon iel nosc mpëni de purté inant y valorisé i mediatëures culturei, na figura che ie bele de mpurtanza essenziela tla sanità, scola y soziel”.
N’autra nuvità dla lege sun la ntegrazion de zitadins fulestieres ie la cunsulta per l’imigrazion y l zënter contra la discriminazion che dëssa cuntribuì ala prevenzion y al cumbater dl razism. Chësta lege garantësc l dërt do n bënsté de basa, ntant che per giapé prestazions sozieles, de sanità, per l cuatier y de istruzion vëniel damandà la residënza tla provinzia. “Da pert dla Provinzia se mpënien a aministré l’imigrazion acioche l possa deventé na ucajion de crëscer economicamënter y culturalmënter, ma nia n problem” sorissea Bizzo.
as
