Jonta lascia prò ezezion per studië da maestra
USP – I truep jëuni che ne ie chëst ann nia stai boni de fé l ejam de amiscion per la facultà de scienzes dla furmazion a Persenon, puderà mpomo jì ala lezion sciche ghesc’ y pona fé do n auter ann l ejam de amiscion. Chësc à cunedì l presidënt dla Provinzia Durnwalder (NCUEI) ai 24 de utober do la senteda dla Jonta provinziela.
De 220 jëuni che se à chëst an prejentà per l’ejam de amiscion ie me passei 42 che fej ora l 19% (13% di tudësc, 23% di taliani y 89 % di ladins). La Jonta provinziela se ova bele l’ena passeda da ju cun chësta situazion per l festide che l ne possa nia unì do assé maestres y maestri de scola. Nsci iel unì fat ora che chëi che ne ie nia passei possa mpomo jì ala lezions dla facultà de scienzes dla furmazion a Persenon y possa n auter an fé do l’ejam de amiscion. Chësta puscibltà vën data aldò di resultac dl ejam a 80 tudësc, 80 taliani y 20 ladins.
Davia che chisc jëuni ne ie ufizialmënter nia studënc universiteres ne giati nce nia i aiuc y tratamënc preferenziei aldò. La Jonta provinziela à fat ora de unì ancontra te chësc cajo speziel. Per l trasport publich iel bele unì dat pro de ti dé l tratamënt speziel per studënc. L medemo uelen nce fé per la cëses di studënc. “Per l servisc de mensa ulons mo abiné na soluzion deberieda cun i respunsabli dl’università” à di l presidënt dla Provinzia. Davia che i jëuni che ie nia passei l ejam de amiscion ne ie ufizialmënter nia studënc, ne possi nia giapé na borsa de studi o l rembursamënt dla cuotes de iscrizion.
D’autri comunicac sun chësc argumënt: Aiuc per l’amiscion al’università de Persenon
as
