Ambiënt | 24.10.2011 | 15:27

Jonta dà pro 19 mulins dal vënt sul Prëner

USP – Sun l Prëner puderal unì fat 19 mulins dal vënt cun na produzion de 100 milion de Kilowatt/ëura. Cumpromis danter la doi sozieteies che ova fat dumanda. Deberieda cun duc i mplanc fotovoltaics che ie bele tl Südtirol saral nsci mesun curì feter l 10% de dut l strom che vën adurvà tla provinzia de Bulsan.

Mpede 22 mulins dal vënt sciche ova damandà la sozietà dl Prëner, ne puderal me unì fat 19. I trëi mulins plu daujin ala sëida ie unic straichei. Per pudëi fé chisc mulins se à la Jonta provinziela (NCUEI) ai 24 de utober damandà na relazion ecologica y n radar che fej fermé i mulins sce vën adalerch na nibla de uciei. L ne puderà nia unì fat doi stredes da ruvé permez, ma me plu una (la vedla streda di saudeies), na sëula rola sota tiera per mené ju l strom y na sëula furnadoia dal material che messerà do i lëures inò unì tëuta demez.

Dut chësc ie stat mesun de pro do che l ie stat n’acurdanza danter la zentrela dal strom de Pflersch che à trata de reviers si proiet de 9 mulins per giapé na partezipazion al proiet dla WPP, la Joint-venture danter Leitwind (51%) y la azienda dal strom (49%) che à proietà i mulins sun l Sattelberg. “Davia che chëi de Pflersch giapa l strom de cater mulins sun l Sattelberg, ne ai nia plu purtà ite n proiet per sé” à spiegà l presidënt Durnwalder.

L Sattelberg ie un di raions plu da vënt de duta Europa. Cun chisc 22 mulins dal vënt puderal unì fat na produzion de feter 100 milion de kilowatt/ëura. Che ie feter tan che vën adurvà tl Wipptal. “Chësta soluzion ie n cumpromis danter l straverde dla cuntreda y sustenì la produzion de energia alternativa” à spiegà l presidënt Durnwalder.

as