Politica | 24.10.2011 | 16:37

Jonta provinziela dà prò la pruposta de lege finanziera

USP – De plu nuviteies cumporta la pruposta de lege finanziera data pro dala Jonta provinziela (NCUEI) ai 24 de utober. I ponc prinzipei reverda la regulamentazion per la njonta IRPEF y IRAP, l finanziamënt per i chemuns y la revijions per camions.

La pruposta de lege finanziera tol ite na lingia de ciamps. La Jonta provinziela à laurà ora na pruposta per l Cunsëi provinziel n cont la njonta sun la chëuta IRPEF che vëija dant l tumé demez de chësta njonta per n davani nchin 15.000 euro al ann. Nchinamò valova chësc me nchin a 12.500 euro. „Cun l pruvedimënt dla njonta IRPEF iel unì dat pro de ti unì ancontra ala families cun n davani mesan” à dit l presidënt Durnwalder do la senteda dla Jonta provinziela. Nsci iel tla pruposta de lege udù dant che l possa unì trat ju 252 euro per uni mut. Chësc vel per n davani nchin a al plu 70.000 euro.

Nuviteies iel nce n cont dl IRAP, che reverda i proscimi trëi ani. Tlo à i assessëures udù dant che la firmes (ora dla banches, assegurazion y cunzescioneres che paia 4,65%, 5,90 y 4,20%) muessa paië na njonta de 2,98%. Ezezions dëssel unì fat per firmes che fej nvestimënc tla tueda y svilup o che ie boni de aumenté la produtività o la stieres. Chësta firmes dëssa me paië 2,5%. Na njonta de me 2% dëssa messé paië firmes che fej na produzion de energia alternativa.

Na cuestion zitia reveda l finanziamënt di chemuns. “Se on tëut dant de ti dé ai chemuns assé scioldi che i possa fé si duvieres zënza auzé la chëutes” à dit Durnwalder do la senteda dla Jonta. L’idea de scurté l finanziamënt de nuef percënt y pona plu tert mo de doi percënt an lascià tumé defin. I chemuns giaterà aldò dla Jonta l medemo finanziamënt sciche chëst ann. Leprò ruva mo la partezipazions al davani sun l strom (11 milion de euro al ann) y l paiamënt per valivé ora l nuzé de ega da fé strom (feter 400 milion de euro te 30 ani). “Ti dé ai chemuns de plu che l ann passà ne ie nia mesun, ajache ne on nia i scioldi” à dit Durnwalder sorissan che, sciche duc, ie nce i chemuns sfurzei a sparanië.

La pruposta de lege finanziera iel nce unì ntegrà la mira de n calënder scolastich unificà che possa smëndrì l’autonomia dla scoles. “Sce ulon unifiché i calëndri – chësc ti va a bën dla families – muessa la Jonta provinziela avëi la puscibltà de mëter dant l scumenciamënt y la fin dl ann de scola. L medemo vel nce per la dezijion sun n’ena scolastica da cin’ o sies dis” à dit Durnwalder.

Per aministré l ciamp drët cumples dl sëurandé lëures publics uel la Jonta nuzé la lege finanziera per mëter a jì na zentrela per sëurandé i lëures publics che possa lauré per la Provinzia, i chemuns y duta la istituzion publiches. “A chësta maniera ons garanzia de dërt y sparanion nce personal” à cunedì l presidënt dla Provinzia. La zentrela per la sëurandata di lëures dëssa scumencé si atività cun l prim de auril 2012 y lauré sota la direzion generela la Provinzia. L sistem de lëur dëssa vester cun n presidënt y n cumité de esperc che dà dant ndicazions. Te chësc cumité dëssel vester reprejentanc dl dipartimënt di lëures publics, dla mubilità, dl’eghes y dla sanità, me nce reprejentanc dl’Assoziazion di chemuns, dl Cunsëi provinziel y di cunsorc de bonifica.

Nuviteies ie nce ududes dant tl ciamp dla sanità. Nchinamò à n iede la Provinzia sëurantëut l custimënt per tratamënc y permò dadedò ie unì scudì da l’assegurazions privates. “Chësc ulons śën drusé: n iede dëssa paië l’assegurazions, y permò sce l ie debujën dëssa paië la man publica” à dit Durnwalder.

Plu flessibilità dëssel unì pità ai dependënc provinziei y dantaprima ai diretëures te chëla che l possa unì fat na rotazion di ufizies.

La revijion di mëndri camions dëssa unì scemplificheda. Nchinamò messoven per chësta revijions furné a Bulsan. La Jonta ulëssa dé chësta puscibltà tres berstotes cunvenzionedes sciche l vën bele fat pra i auti. Chësc dëssa unì a valëi per camions nchin a 3,5 tones. L pruvedimënt dëssa unì fat per ti fé sparanië ai zitadins tëmp y scioldi.

Udù dant iel nce che na pert dla ntredes di juesc de fertuna dëssa unì adurvei per la prevenzion. Nsci ulëssen adurvé 1,5% de la ntredes te n ann, che ie de feter 21 milion, per cumbater la dependënza dal juech.

N cont di prudoc da tlo iel udù dant - per ejëmpl per la feries ti luesc da paur - che duc i prudoc che ie unic fai tl Südtirol posse unì pitei sciche prudoc da tlo.

Tla pruposta de lege finanziera iel nce udù dant co che la Provinzia uel sëurantò la funzion de cuntrol dala Chëurt di Conc. Aldò de na norma de atuazion sun l Statut de Autonomia dëssa la Provinzia cialé do si istituzions y sozieteies. La relazions di cuntroi muessa pona unì dates inant ala Chëurt di Conc. L’atività de cuntrol dëssa fé n gremium nuef dla Provinzia. Chësc dëssa deventé na filiela dla repartizion per Enc locai y vester metuda adum da doi reprejentanc dl ufize per cuntroi dla Provinzia, n reprejentant dla repartizion per enc locai, dla finanzes y bilanz, ma nce n reprejentant dl Cunsëi provinziel y di Chemuns.