Regulamënt per maestri de schi dl Südtirol azetà a livel de UE
USP – Mantenì la cualità dl nseniamënt de jì cun i schi y schivé che l vëniel adalerch maestri de raions dubiëusc sciche Montenegro o Albania: chëst se à tëut dant l assessëur Hans Berger. A Brüssel ti iel ai 15 de utober unì segurà che l regulamënt per maestri de schi tl Südtirol va a una cun la normes europees y che l ejam dëssa giapé na cualificazion europea.
Tl mëter n drova la normes europees sun i servijes iel unì debatù co regulamenté l mestier da maester de schi. “La minonghes ie drët defrëntes, davia che i stac cumëmbri nueves uel na liberalisazion y la nazions alpines tlassiches uel seguré l livel aut de cualità” nsci Berger, che sorissea che l südtirol tën dala cualità.
Do n’ancunteda cun reprejentanc dla repartizion per servijes dla direzion generela per l cumerz tl’Union Europea, rejona l assessëur de tëmp plu lonch per arjonjer na cualificazion dl mestier. “Davia che la streda ie mo longia, se tratela dla definizion de standard minims mo per chësta sajon da inviern” à dit Berger.
Chisc standard reverda i elemënc de basa n cont de segurëza sun i purtoies ("Eurosecurity") y n ejam pratich dla capaziteies de jì cun i schi ("Eurotest"). “Tramedoi ejams possa unì sëurantëuc do la rata saurì te nosc regulamënt de ejam, scebën che l ie mo da stlarì i details per l ejam pratich.” dij l assessëur provinziel che uel purté dant la mudazion ala Jonta provinziela pernan che la UE à metù dant i standard minimi. I doi criteries europees ie per l Südtirol me na cualificazion sëuraprò y nia na forma nueva de furmazion.
I standard minimi europeics śera tl medemo mumënt nce na liberalisazion totala. “l problem di maestri cun n ejam fat tl Montenegro y tl’Albania messëssa nsci vester schivà” dij Berger do vester stat a Brüssel ulache l ti ie nce unì segurà che l regulamënt per maestri de schi respetea la normes europees y che l ie drët inuvatif. “Ne lasceron nia do de seguré la cualità dl nseniamënt de jì cun i schi nce tl daunì” sorissea Berger.
as
