Raions dai schi ladins premiei per si vela per families
USP – Aldò dl automobilclub tudësch ADAC ie la Mont de Sëuc, l’Alta Badia y l Plan de Corones i raions dai schi che ti vën l plu ancontra ala families. Per l assessëur al turism Hans Berger testemunieia chësc recunescimënt na bona vela per la families te dut Südtirol.
Per l ADAC Ski Guide 2011 iel unì analisà de ndut 650 raions dai schi te cin stac alpins n cont de si atratività y vela per mëndri y families. Danter i prim 10 raions iel trëi dl Südtirol, duc raions ladins: Mont de Sëuc (terzo), l’Alta Badia (cuarto) y l Plan de Corones (otavo). Dlongia la relazion danter priejes y prestazions, i priejes dl Skipass per granc y pitli, iel nce unì tëut n cunsciderazion i chilometri de purtoi, la cumpëida de purtoies saurì y la vela de cumpaniamënt per gesć y la scolines dai schi. Prim tla tlassifica dla vela per families ie l raion dl Stubaital.
“Südtirol se à fat inuem de vester n raion turistich adatà per families. La valutazion dl ADAC testemunieia chësta cualiteies. L ne ie nia me resultat de nvestizions che ie unides fates, ma nce l lëur che vën di per di fat cun gran atenzion y prufescionalità” se ncunforta l assessëur Hans Berger.
as
