Ambiënt | 03.11.2011 | 10:55

Furnel dal refudam: dal 2013 strom y sciaudamënt a destanza

USP – A Bulsan Sud vëniel fat n furnel dal refudam che dëssa dal 2013 nuzé l refudam per fé strom y sciaudamënt a destanza. L presidënt dla Provinzia Durnwalder y l assessëur Mussner ti à (INIER) ai 2 de nuvëmber, deberieda cun l ambolt de Bulsan Spagnolli, cialà ai lëures y à nce tratà cuestions de finanziamënt.

Te doi ani, nchin ala fin dl 2013 dëssa l mplant nuef per lauré l refudam a Bulsan Sud jì n funzion y brujé ntëur 130.000 tones de refudam al ann. L furnel nuef ie per la Jonta provinziela n strumënt de mpurtanza per manejé l refudam dl Südtirol: materiai che n ne possa nia adurvé mo n iede ruva tl refudam che unirà brujà tl mplant a Bulsan y nsci trasfurmà te ciaut y energia.

L presidënt Luis Durnwalder y l assessëur Florian Mussner à vijità l cantier dl furnel dal refudam. L raion ulache l vën frabicà mesura 2,5 hectar, sun 8000 metri cuadrac vëniel frabicà. L mplant per lauré l refudam unirà a custé feter 123 milion de euro. Cuestions de finanziamënt che ie mo daviertes ie te chësta ucajion unides nunziedes dla presidënt dla Provinzia: “I lëures va inant drët bën a na maniera che te doi ani possa l mplant scumencé a lauré l refudam per dut Südtirol. Per chësta rejon messerà nce duta la provinzia judé tl finanziamënt. La forma adateda muessa la Provinzia, la zità de Bulsan y i chemuns permò abiné. L frabicat ie na nvestizion per l daunì, ma l muessa nce unì menà economicamënter. Nchin ala giaurida iel nce mo da anjenië la cundizions acioche na pert dl custimënt posse unì paià ju nstës cun l strom y l sciaudamënt a destanza”.

Davia che l mplant nuef vën fat aldò di standard tecnics plu auc, vëniel garantì che l ciaut vën nuzà cun na majera efiziënza y che l fum vënie filtrà miec permez al vedl furnel che lëura bele 20 ani. L mplant nuef arjunjerà na prestazion mascima de 32,7 megawatt y puderà mandé 260.000 megawatt de ciaut a destanza tla rë de sciaudamënt. Aldò de n cunzet generel uniral nuzà l miec l ciaut dl furnel te chëla che la rë de sciaudamënt a destanza dla zità de Bulsan vën ngrandida. A chësta maniera puderal unì nuzà passa 50% dl ciaut dl furnel. Cun n culegamënt cun l spedel de Bulsan y l adatamënt dl mplant da sferdé, pudëssel unì nuzà nchin a 70% dl ciaut dl furnel ntan la sajon ciauda. Aldò dl cunzet generel pudëssen cun chësta cundizions de ndut sparanië feter 18 milion de litri de uele da sciaudé.

N cont dl frabicat iel bele unì finà l ressanamënt dl fonz y majera pert dl frabicat de aministrazion, la buja per l refudam, l local per la turbines y l frabicat per servijes tecnics. L assessëur ai lëures publics Mussner à sorissà che te duta la Talia ie me mo un n tel mplant dal refudam y che l frabiché dla strutura cumporta perchël na ucajion particulera per la firmes dl Südtirol: “N proiet de chësta mesura ie na ndesfideda per nëus duc. La firmes da tlo che lëura tlo à nchinamò mustrà cun mprescion cie che ie ie boni de fé. Ie son dla cunvinzion che l frabiché de chësc furnel dal refudam te tëmps economicamënter critics cumporta n rafurzé dla firmes da tlo y che la firmes possa tres chësc lëur nce se fé inuem per d’autri de tei mplanc”.

Chisc dis iesen tl lëur de mëter su la strutures de fier per l frabicat danter l paiuel y l filter per l’aria. La luegia per l refudam ie feter fineda, la luegia per l fuech dëssa unì fineda nchin de fauré y l sistem per l’aria nchin de mei 2012. I prim toc dl paiuel da sciaudé vën chisc dis ciariei sun n bastimënt tl’India y messëssa nchin ala fin de nuvëmber ruvé a Bulsan. L paiuel dëssa pona unì metù adum y finà nchin de utober 2012. Aldò di programs dëssel d’ansciuda 2013 unì scumencià l’atività dl furnel, i lëures dëssa unì finei de dezëmber 2013.