Lungiarü à ciafè na strada plü sigüda y da fà saurì
USP – Danter S.Martin y Lungiarü él gnü portè a fin i laûrs por comedé la strada. Sön inciaria dl Assessorat provinzial ai laûrs publics él gnü slarié y splanè la strada por garantì na miù viabilité y sambëgn plü segurëza sön strada.
La strada por rové a Lungiarü mosorâ denant 4 metri de larghëza, massa strënta canche n auto y n camion s’incuntâ. “Cun la strada nöia ne unse śëgn nia plü chëstes dificoltês tl surpassè y implü pon jì cun l’auto plü sigüsc danter San Martin y Lungiarü” spliga l’assessur Florian Mussner. Dal chilometer 4,0 ćina 5,5 él gnü slarié y splanè la strada, la adatan inće ales normes atuales de segurëza. I laûrs é gnüs fać sön chës perts de strada olach’al ê le maiù debojëgn.
Aladô dles diretives provinziales é les döes corsies gnüdes adatades a na larghëza de 2,5 metri cun laprò mez meter de ur de strada. Te so punt plü ërt à la strada na pendënza dl 10%. Le raiun danter San Martin y Lungiarü é plütosc da plan, porchël él ma te püć posć stè debojëgn de mürs de fondamënta por la strada.
I laûrs é gnüs fać dala firma Wipptaler Bau por n costimënt de 637.600 euro. Deache la proietaziun é gnüda fata dal Ofize provinzial por frabiché strades instës, ne pësera nia tl costimënt general. Danter laûrs, provedimënć de segurëza y na soma por i bojëgns nia odüs danfora à l’Assessorat ai laûrs publics fat n investimënt de indöt 912.175 euro por la strada che va ite a Lungiarü.
as
