Aministraziun | 07.11.2011 | 14:35

Nteres dla Jonta provinziela per cumpré l’azions Edison dla zentreles dal strom

USP - La Jonta provinziela à tëut a cunescënza la puscibltà de cumpré su la azions dl EDISON de 8 zentreles dal strom tl Südtirol. L presidënt Drunwalder à do l senteda (da NCUEI) dl 07 de nuvëmber rujenà de na ucajion unica per sëurantò dut l avëi de chësta zentreles. La sozietà SEL ie unida nciarieda de marciadé nce cun l’ENEL.

L nteres da pert dla Jonta provinziela per cumpré su i 40-42% dl’azions de Hydros GmbH y SELEDISON AG, che ie tla mans dl’EDISON ie grant y perchël uelen nce nuzé chësta ucajion. L’EDISON nstëssa ie de avëi de doi majeri patrons: na pert fanzëusa y na taliana. “Davia che i franzëusc ulëssa arjonjer la maiuranza, se pieta l’ucajon che ëi vënd plu saurì si azions dla zentreles dal strom tlo da nëus” à spiegà Durnwalder te cunferënza stampa. La se trata de ndut 8 zentreles dal strom. Chëles de Kastelbell y Glurns ie per l 42% tla mans de EDISON, la zentreles de Laas/Martell, Graun, Marling, Barbian/Pruca, Wiesen/Pfitsch, Prembach y Bruneck/Valdaura (cun na pruduzion anuela de na miliarda de chiliowatt/ëura) al 40%. Chësc bon mumënt dëssa nce unì nuzà per purvé a sëurantò pertes de zentreles tl Südtirol che ie dl’ENEL. Nscì à la Jonta provinziela nciarià la sozietà SEL de marciadé nce cun chësc conzern dal strom.

Te chësc mumënt ne iel mo nia na zifra sun mëisa per cumpré ju l’azions dl’EDISON. Da pert dla Provinzia, nscì l presidënt, dëssel nce unì marciadà cun la cuotes provinzieles. Sëuraprò muessel unì tenì cont dla ntredes de cassa n relazion ala cunzescions che toma ti proscimi ani (2014 a Burnech y Valdaura, y d’autri).

L cumpré su dl’azions dla zentreles dal strom tl Südtirol purté prò che la ntredes reste tlo. “Per la nvestizion ne dëssel nia unì adurvà scioldi dl bilanz provinziel, tlo messerà la SEL mpresté su scioldi” à dit Durnwalder. La Jonta provinziela valuterà l resultat dl marciadé, dan azeté la nvestizion.