Aministraziun | 07.11.2011 | 15:21

Chëuta turistica y finanziamënt di chemuns tla lege finanziera

USP – La Jonta provinziela à (NCUEI) ai 7 de nuvëmber anjenià la cundizions per na regulamentazion nueva dl finanziamënt turistich tres la lege finanziera. Te chësta lege an nce udù dant de jì de reviers ala vedla forma de finanziamënt di chemuns che dëssa giapé na cuota segura de 13,5 percënt.

A livel naziunel iel cun l federalims dla chëutes unì udù dant na chëuta turistica. La Jonta provinziela ova bele da mez ann tëut la dezijion de nia sëurantò chësta norma, scebën che n ova udù l bujën de na forma nueva de finanziamënt dl’urganisazion turistiches. La Jonta provinziela à śën anjenià la cundizions per na regulamentazion nueva te chëla che l possa unì metù na chëuta de cura nchin a doi euro per persona, per nuet afiteda. Mplu iel nce unì udù dant la puscibltà de fé paië duc i ciamps che prufitea dl turism. “On udù dant la puscibltà de mëter su 1 promile sun la chëuta IVA. Chësta regula unirà me metù n drova sce n ruva a una cun i partner soziei” à dit Durnwalder do la senteda dla Jonta provinziela.

Tla pruposta de lege finanziera iel nce unì juntà na nuvità per l finanziamënt di chemuns. Da n struf vëniel ann per ann marciadà ora da nuef tant che i chemuns giata dal bilanz provinziel. Davia che n ne à nia arjont i resultac che n se aspitova da chësta forma, uelen inò jì de reviers ala forma da dant. Nsci uelen ti dé na pert segura de 13,5% sun la ntredes di prim doi capituli. “I chemuns se ova damandà 14%, ma chël ne pudons nia fé” à dit Durnwalder. La Jonta provinziela à azetà l regulamënt nuef per spartì i mesuns danter i chemuns, che ie unì laurà ora dala Lia di chemuns. Aldò de chësc regulamënt uniral nce tenì cont dla ntredes di chemuns per la produzion de strom y tres la chëuta ICI.

as