Trafich | 10.11.2011 | 15:17

Südtirol Pass n funzion dal 14 de fauré

USP – Te trëi mënsc scumëncia n tëmp nuef per l trasport publich tl Südtirol: dal 14 de fauré 2012 jirà n funzion l sistem nuef dla tarifes y l Südtirol Pass tulerà ite la luegia dl vedl abunamënt. L assessëur Thomas Widmann à (NCUEI) ai 10 de nuvëmber prejentà la nuviteies sorissan che cun la cherta nueva puderan furné cun curieres, ferates y furadoies publiches te dut l raion provinziel. L Südtriol Pass possa bele unì apustà dai 15 de nuvëmber (DUMAN) inant.

Do che l ie unì miurà y mudernisà la rë dl trasport publich, aumentà i culegamënc y metù a jì n abunamënt per sculeies y jënt de tëmp che vel per dut l raion provinziel, fej l Assessorat ala Mubilità n var leprò per miuré l trasport publich. Cun l Südtirol Pass vëniel pità chertes che va cun la tecnologia contactless y n sistem nuef dla tarifes. La doi nuviteies jirà n funzion ai 14 de fauré 2012. Trëi mënsc dant à l assessëur Widmann, cumëmber tla Jonta provinziela nciarià per la mubilità, prejentà l Südtirol Pass: “La cherta nueva possa unì adurveda per duc i mesuns de trasport publich tla Provinzia y ie saurì da adurvé”.

Widmann à sorissà che l Südtirol Pass ne ie nia me pensà per perndolares, ma che l dëssa avëi na nfluenza tla cultura de mubilità de duta la cumenanza: “Nosc obietiv ie che uni una y uni un dl Südtirol ebe n Südtirol Pass te fuia. L furné cun mesuns publics dëssa deventé na cossa naturela. Son dla cunvinzion che chësta “tle” per dut l trasport publich ie n var mpurtant per n cumpurtamënt de mubilità nuef cun na majera cuscienza per l ambient. L dëssa deventé n cunliamënt flessibl dla vela de culegamënc che porta a na miëur cualità de vita.”

L ticket nuef funziunea “contactless”, i viages vën trai ju zënza tuché i aparac y la cherta possa unì ciarieda tres banca o tres internet, ma nce diretamënter pra la purtines. La cont vën fat aldò di chilometri che n furnea. Plu che n furnea cun mesuns publics y manco che vën a custé l chilometer singul.

Ai 14 de fauré 2012 tulerà l Südtirol Pass la luegia de duc i abunamënc y chertes per families. I vedli abunamënc ne jirà da chësta data nia plu. Per chësta rejon iel dantaprima per i pendolares de mpurtanza apusté l Südtirol Pass per tëmp. Chësc possa (dal 11 de nuvëmber) unì fat tres internet (www.suedtirolmobil.info). Sun chësta plata web possel nce unì fat n cont persunel per pudëi cialé do tan de chilometri che n à fat y cialé do i paiamënc. I dis che vën possa l Südtirol Pass nce unì apustà pra la purtines dala chertes. L Pass vën fat nominatif sun la persona y i documënc per l’ativazion vën mandei n cësa. L ativazion vel per n ann y possa pona unì renuveda tres l cont persunel sun la plata web o pra la purtines.

Uni viac cun l Südtirol Pass ie plu bon marcià che no na cherta singula o cun la cherta de valor. “L Südtirol Pass ie a uni maniera la puscibltà a miëur priesc per tò la curiera o ferata, unfat sce n furnea uni di o me d’inrer. Nce chiche miena de ne adurvé mei l Südtirol Pass, ie te n cajo de bujën povester cuntënt de l avëi pea canche l porta l auto a fé la revijion o sce l ne ie nzaul deguna lueges da lascé l auto” à dit l assessëur Widmann.

Chiche à nchinamò abù n abunamënt, giata n bonus te chëla che l ti vën calculà 500 chilometri bele furnei per ruvé dant tla tarifa plu bon marcià. Families cun mutons sot a 18 ani scumëncia ënghe cun na tarifa plu bassa.

D’autri comunicac stampa sun chësc argumënt

Tarifes nueves per l trasport tenian cont de families y pendolares

Miëur priejes per chiche l adrova de plu: Südtirol-Abo

Jonta da prò n sistem nuef de abunamënt: plu chilometri, miëur priejes

Trasport publich te dut Südtirol cun un n abunamënt