I laûrs sön le secundo tòch dla strada da Rina é rovà
USP – Chisc dis vëgnel stlüt jö i laûrs sön le secundo tòch dla strada che condüj sö Rina. Chilò él en chësc ann gnü slarié la strada por ti pité plü segurëza ala jënt che passa. “Cun le rové de chësc lot é na bona pert dla strada deventada plü sigüda ince por corieres y camions che po insciö rové plü saurì sö Rina” spliga l’assessur Mussner.
Le secundo lot di laûrs pro la strada da Rina reverda presciapüch 1000 metri de strada danter le chilometer 0,54 y le chilometer 1,60. Chilò él stè debojëgn de fà sö danü mürs sura y sot a strada. Por slarié la strada él inće gnü adorè micropà. “Mëte al sigü le rogn é te chësc caje dër ri ajach’al é dassënn ërt” spliga le geometer Davide Ziller. Inće sce les condiziuns ne n’é nia scëmples, ne mëss la strada instëssa nia gnì spostada.
Ćina pro le chilometer 1,3 él bele gnü metü l’asfalt definitif y sön le tòch dessura él tratan chëstes ultimes edemes ćiamò gnü portè a fin i laûrs pro le mür sura pert de strada. I laûrs sön inćiaria dl Assessorat provinzial ai laûrs publics é gnüs fać dales firmes Wipptalerbau y Niederwieserbau por na soma de contrat de 2.241.500 euro.
I laûrs por miorè la strada da Rina é gnüs despartis sö te trëi perts. Por mëte al sigü y slarié la strada dal punt da Rina ćina sö tl paîsc da Rina à l’Assessorat provinzial ai laûrs publics odü danfora n investimënt de indöt 7.473.000 euro. La strada é te n raiun che ne sta nia cîs frëm. La strada vedla ê alüsc ma 4 metri leria. “Chësta strada é te n valgönes perts massa ërta por garantì na bona viabilité y dantadöt la segurëza por les porsones, porchël unse lascè fà chisc laûrs” dij l’assessur Florian Mussner. Tl proiet dl ing. Gustav Mischì n’él nia ma gnü tignì cunt dl slarié la strada mo bëgn inće dl tó demez pendënzes che röia ćina al 14-15%. Canche düć i laûrs sarà stlüć jö se fajarà i auti, les corieres y d’atri mesi ćiamò maius plü saurì da passè sambëgn inće tles set gran otes che condüj sö Rina.
La pröma pert di laûrs ê gnüda fata sön na lunghëza de 500 metri, slarian la strada y fajon inće danü n pice punt de 6 metri de lunghëza.
Le proiet esecutif dl terzo lot éson tl laûr da realisé y dess gnì rové da d’aisciöda. Ara se trata chilò dl’ultima pert de feter 2 chilometri por rové ćina tl paîsc da Rina.
as
