La mostra dla ferata ie te Sëlva, leprò n catalogh
USP – La mostra sun la ferata de Gherdëina ie sën da pudëi vijité tl Tublà da Nives te Sëlva. (NSNUET) ai 18 de nuvëmber iel n ucajion dla giaurida nce unì prejentà l catalogh de chësta mostra metuda a jì dal Museum Ladin.
L catalogh documentea i esponac y la tematiches che ie unides lauredes su per la mostra dl Museum Ladin. Sun cunzet dl diretëur dl Museum Stefan Planker, che se à cruzià dla nrescida y dla documentazion di esponac, à Elfriede Perathoner scrit i tesć. L liber prejënta sun 332 plates n toch de storia mpurtant de Gherdëina mustran sun coche la fova unida a se l dé, la struscies al frabiché y la cunseguënzes. L catalogh te trëi rujenedes, ladin, tudësch y talian ie da giapé tla doi sëntes dla Museum Ladina a San Martin y San Ciascian, ma nce tla sëntes dl Isititut Ladin Micurà de Rü a San Martin y te Sëlva o nce tla butëiga dai libri a Urtijëi (33 euro).
La mostra sun la ferata de Gherdëina dal titul “Scibla mo n iede, la ferata de Gherdëina danter lecorc y vijions”, ie unida fata sun la basa de na nrescida y de truep esponac.
L ie da udëi la proietazions fates dan feter 100 ani, documentazions dl frabiché y la tapes dla ferata che ie furneda dal 1916 per 44 ani. De nteres particuler ie la vijions che bera Josef Rifesser da Stufan ova abù te chëi tëmps. Ntlëuta fovel stat gran nteres per na ferata da Bulsan a Cortina, Rifesser ulova la fé passé tres Gherdëina. La vijions che n ova bele dan n secul, possa tla mostra unì paredledes a doi proiec de na ferata dal didancuei. Da udëi iel nce doi modiei, un dla ferata de Gherdëina y un de chëla de Renon fata su ti medemi tëmps.
La mostra fova da udëi nchin ala fin de utober a San Martin, tla sënta dl Museum Ladin, sarà da udëi nchin ai 12 de fauré 2012 te Sëlva.
as
