Desvalì | 22.11.2011 | 15:20

Segurëza sun i purtoies do l ejëmpl de n proiet cun sculeies

USP – Plu segurëza sun i purtoies per i mëndri ie l ubietif de n proiet de Skirama Plan de Corones ulache ntan l proscimo inviern fajerà pea 551 sculeies. „N proiet de ejëmpl che dëssa unì fat do te dut Südtirol“ à metù a cuer l assessëur Hans Berger ntan la cunferënza stampa, (NCUEI) ai 22 de nuvëmber.

La segurëza ti raions da jì cun i schi y l’età di sculeies ie doi elemënc de forza per mparé n cumpurtamënt segur sun i purtoies. Sun chësta basa à l raion Plan de Corones dan doi ani nvià via na scumenciadiva per sculeies dl’elementera per aumenté la segurëza sun i purtoies. „Chësta scumenciadiva ie de ejëmpl per dut Südtirol, perchël se mbincions che truep raions dai schi la feje do a na maniera che l nasce na rë de raions te chëi che la segurëza ie agrumënt zentrel“ à dit Hans Beger.
La se trata ruvé plu daujin al sport dai schi y tl medemo mumënt de mparé a cunëscer la dodesc regules de segurëza dla FIS. „Majera pert de chëi che va cun i schi ne cunësc nia la regules de cumpurtamënt y chësta mancianza cumporta suvënz n fauz cumpurtamënt“ à spiegà Matthias Prugger, presidënt dl raion Plan de Corones. Ai sculeies ti vëniel perchël nsenià la regules cun juesc, cun l fin de smëndrì la desgrazies gaujedes da n fauz cumpurtamënt.
L proiet ie na culaburazion danter la scoles elementeres, la scoles de schi, l prim aiut sun i purtoies, i judacrëp, la Forestela y la Crëusc Blancia. L ie udù dant cater uniteies che possa unì fates sciche materia opzionela. Un’unità ie teorica, tlo vëniel nsenià dal bosch de inviern nchin al sucors. Tl’autra trëi uniteies vëniel te de pitla grupes fat uniteies sun la nëif.

Ntan l inviern 2011/12 unirà la scumenciadiva per l prim iede piteda a duc i sculeies dala terza ala cuinta tlas dl’elementeres tl raion dl Plan de Corones. De ndut saral 551 sculeies che fajerà nchin de merz i cursc de segurëza, dan doi ani oven scumencià cun 150 sculeies.

„L skipass y la massaria da schi vën metuda a desposizion debant. Leprò ons mo anjenià materiai didatics“ à dit l diretëur de Plan de Corones Andrea Del Frari rujenan de n custimënt de 13.000 euro. L material didatich reverda na DVD cun cartoons sun la 12 regules de segurëza dla FIS y n juech memory che trata ënghe dla regules FIS. Sun Plan de Corones iel mplu unì fat n "Kids Safety Park" y duc chiche compra na cherta de sajon, giata na vaina cun lessù la regules FIS.

as

Galaria dales fotografies

Downloads