Furmazion y Cultura ie la prioriteies de Kasslatter Mur per l 2012
USP – Belau na miliarda ie ududa dant per la furmazion y cultura tl 2012. I majeri capituli reverda la scola y l dërt de studië. “L pudëi se istruì ie n dërt de uni persona che ti garantësc pruspetives y cualità de vita” à (NCUEI) ai 25 de nuvëmber dit l assessëura Sabina Kasslatter Mur.
L ciamp dla furmazion, cun passa 850 milion de euro per duta trëi grupes de rujeneda (leprò mo 71 milion per la cultura), ie una dla puecia pertes tl bilanz provinziel che ne unirà nia scurteda, sciche l ie stat n generel cun 9%, 6% y 2% de manco permez al ann dant. “L fej plajëi che la scola, la furmazion y cultura vënie cuncretisei a na maniera da ti pité a nosc jëuni de pudëi se istruì, de crëscer y de pudëi se fé pruspetives positives per si daunì de lëur y per si vita” à dit l’assessëura.
La pert zentrela per Kasslatter Mur ie de seguré l dërt de studi ulache n à udù dant feter 130 milion de euro. “Tres la borses de studi, i libri y materiai didatics o l trasport pudons garantì la medema pusciblteies a duc. Y chësc zënza tenì cont dl davani de na familia o ulà che la vif. Tla Provinzia de Bulsan ti vëniel garantì a duc l dërt de studi” à dit l’assessëura.
La majera prëscia de paië ora iel per i nsenianc, per i culaburadëures pedagogics y aministratives che fej ora 664 milion de euro tl bilanz provinziel. “La va de na nvestizion positiva, nsci Kasslatter Mur, ajache chësta persones, si cumpetënzes y si capaziteies ie la tlé per l suzes de nosc sistem de furmazion tla Provinzia de Bulsan”.
as
