Acurdanza per l internet a slune
USP - Davia che ne vën nia me mudernisà la roles per i culegamënc internet a slune, ma nce la zentreles di chemuns iel uni purtà inant tratatives cun la Telecom. L assessëur Mussner à (NCUEI) ai 28 de nuvëmber prejentà ala Jonta provinziela i resultac dla tratatives che vëija danora de sotscrì n’acurdanza.
Cun majera nvestizions vëniel te dut Südtirol laurà per culeghé duc i chemuns ala rë de fibres otiches. N se à tëut dant de taché ite nchin dl 2013 duc i chemuns. Dut chësc mpëni ne possa nia unì nuzà sce la zentreles dla Telecom ie te truep caji massa dëibles y nia adatedes per tan de bon culegamënc.
“Nchin dl 2013 ne ulons nia me finé la roles per la fibres otiches, ma cialon nce che la zentreles dla telecom ti chemuns vënie adatedes tecnicamënter” à dit l presidënt dla Jonta do la senteda.
Ultimamënter iel de unì marciadà cun la Telecom de chësta zentreles ruvan a una de mudernisé nchin a 110 zentreles y nia plu de adurvé duta la 167 che ie sën mo n funzion. Ruvei a chësc pont possel unì anjenià n cuntrat de acurdanza che dëssa unì dat pro te Jonta provinziela l’ena che vën.
as
