Sci dla Jonta provinziela per Ried y n purtoi te Ulten
USP – Doi proiec de purtoies dai schi ie (NCUEI) ai 28 de nuvëmber unic azetei dala Jonta provinziela de Bulsan. Te Puster possel unì adatà l purtoi de culegamënt danter Plan de Corones y la ferata. Te Ulten se tratela de pudëi furné cun i schi dala Schwemmalm nchin te valeda.
Per la varianta dl purtoi Ried se tratovela dl ejam de dann ambientel. “On azetà chësc adatamënt ajache son de chëla che chësc deventerà n model per duta l’Elpes” à dit l presidënt Durnwalder do la senteda dla Jonta. Cun de tei proiec deventeral puscibl muever dala ziteies cun la ferata y ruve tl Südtirol nchin pra l purtoi dai schi.
Chësc cunzet vën sperimentà cun l culegamënt dla stazion de Percha-Plan de Corones, che ne ie nia n proiet sëul. Velch da de tel dëssel nce unì fat orainsom Puster a Vierschach per ruvé dala stazion dla ferata diretamënter pra l raion dai schi Helm. “Nce per la stazion de Persenon y la Plose vëniel pensà a n tel model” à dit Durnwalder. La tratatives cun la ferata ie bele nviedes via. Canche chësta ideies sarà cuncretisedes, saral mesun arjonjer i raions da jì cun i schi astilan ora stredes mpifedes. “Pudron se sparanië truep auti y curieres che mpifa la streda de Puster o l’autostreda” à dit l presidënt dla Provinzia.
La Jonta provinziela à nce azetà l proiet dl purtoi dai schi cun mplant da fé nëif per l raion Schwemmalm te Ulten. Cun chësc purtoi saral mesun furné cun i schi nchin tla valeda ulache l ie la stazion dla furnadoia.
as
