Politica | 29.11.2011 | 13:23

Cooperazion, marketing y finanziamënt ie la prioriteies de Berger tl bilanz 2012

USP – Per l assessëur Hans Berger iel tler che sce n tën cont dla fazion dl turism per l’economia, ie chësc ciamp reprejentà melamënter. Purempò possel cun 36,5 milion de euro unì fat n pue’ de zeche, sce n va inant cun n marketing prufesciunel, sce n sënta sun la culaburazion danter urganisazions turistiches y abine formes nueves de finanziamënt.

Pra la prejentazion dla prioriteies de bilanz 2012 à l assessëur Berger (NCUEI) ai 29 de nuvëmber sorissà che l ie stat mesun schivé de scurté l capitul dl turism. Cun 36,5 milion de euro iel a desposizion la medema soma sciche chëst ann. „Chësta soma ne spidla nia la fazion dl turism per nosta economia, ma l turism muessa nce nstës vester bon de se mëter a jì na miëura basa de finanziamënt“ à dit l assessëur fajan referimënt ala puscibltà de mëter na chëuta de cura y de turism. Chësta puscibltà fova unida metuda tla pruposta dla lege finanziera y ie pona unida data inant ala Cunsëi provinziel sciche pruposta de lege a pert.

Festide ti fej al assessëur che n ie tardives cun la dumandes singules per cuntribuc. “Tl 2012 uniral laurà cun 10 milions che ie mo di ani 2007 y 2009, per l 2013 fejen cont cun mo cinch nchin set milion de euro da paië ora” à dit l assessëur. Purempò vëniel pensà de lascé pro tla segonda metà dl 2012 cuntribuc per nvestizions turistiches tres l fond de rotazion nce te raions svilupei.

Feter 12 milion de euro dl budget turistich ti va ala SMG, che finanziera limpea la prejentazion dla destinazions turistiches dl Südtirol sun l marcià. “Te n prim mumënt semea chësc truep scioldi, ma sce paredlon tant che d’autri raions spënd y cie resultac che n à limpea, ne possa la prestazion dl SMG nia unì sciazeda assé” à dit Berger.

Per l finanziamënt de 82 lies turistiches y 11 cunsorc turistiches iel per l 2012 prugramà de ndut 9,7 milion de euro. L assessëur se mbincia na culaburazion plu stënta danter l’urganisazions, ma nia me per sparanië ressorses, ma nce ajache n pudëssa miuré la prejentazion sun l marcià.

N pensier a pert à l assessëur nce abù per la uties da mont, che ie strutures mpurtantes per l turism, ma per chëles che n à me ntëur 700.000 euro a desposizion. Chisc scioldi tleca me per strupé de pitli bujes, ma debujën fossel aldò de Berger bën de plu. Tenian cont che truepa de vedla uties dl CAI ruva tla mans dla Provinzia muessa unì ressanedes o fates su da nuef, muessen abiné na funtana de finanziamënt nueva.

N cont dl lëur da paur, à Hans Berger dat pëis al mudé dl tlima. Nsci vala de fé nvestizions per blandé ciamps y versura, de pité cunsulënza y adatamënt al lëur da paur te raions da mont. Per l’agricultura iel tl 2012 udù dant 84 milion de euro. L mudé dl tlima porta l bujën de seguré ega per l’agricultura. “Messon se tò dant de ciafië cun manco ega, perchël messons fé nvestimënc tla tecnica” à dit Berger. Per judé a finanzië mplanc da blandé iel bele unì adatà i capituli tl bilanz.
N segondo pont che taca adum cun l mudé dl tlima ie la malaties dla plantes y parassic. Do l dann che i paures à ultimamënter bele abù iel unì prugramà de plu scioldi per cunsulënza, tueda y svilup de chësc vieres.

La se trata de fé a na maniera che i paures sibe anjeniei a reagì al mudé dl tlima, te chëla che n ti pieta savëi. “Chësc vën bele fat tla scoles che ti ultimi ani à arjont mo n tant de sculeies. Chësc testemunieia che n à udù ite che l lëur da paur ne possen nia svilupé zënza furmazion” à dit Berger.