Azetà l masterplan per l aeroport
USP – La Jonta provinziela à (NCUEI) ai 5 de dezëmber dat pro l masterplan per l aeroport de Bulsan. L ie udù dant de adaté la lunghëza dl purtoi di julieres y la lerch de segurëza. Mplù dëssel unì pità trëi linies a priejes mesans cun mascins che respetea l ambient.
Per l aeroport iel doi pusciblteies. La Provinzia possa lascé vester l mené dla aeroport, a na maniera che l’aministrazion ti tumëssa inò al’autorità statela ENAC che la scrijëssa ora da nuef. “A chësta maniera perdëssen uni cumpetënza sun l aeroport” à dit l presidënt dla Provinzia Durnwalder riesc do la senteda dla Jonta provinziela. La segonda puscibltà ie chëla de fé adatamënc ala normes nueves per n aeroport de categuria 2C che cumporta nce lëures.
La Jonta provinziela ie stata per la segonda alternativa azetan l cunzet per svilupé l aeroport per pudëi damandé de slungë la cunzescion de aministrazion. L ie udù dant de arjonjer i 1431 metri de lunghëza scric dant. Chësta mesura vën damandeda aldò dla cundizions che depënd da temperatures y sajons tlo da nëus. Debujën ie de ngrandì l raion de segurëza da 150 a 300 metri de viers de nord. Permez a sud ie la Provinzia bele patrona de 280 metri che muess me plu unì curì cun asfalt. L raion de segurëza muessa da chësta pert avëi na lunghëza de 185 metri y chësc toch muessa mo unì cumprà. “Chësc toch ne muessa nia unì curì de asfalt, l tleca che l fonz sibe dur assé” à spiegà l presidënt.
Da pert dla Provinzia uelen scrì ora trëi linies. “Ulon mantenì i joi a Roma y junté leprò l culegamënt cun Viena y n cajo nce cun Frankfurt” à dit Durnwalder. La chertes per chisc joi ne dëssa nia custé plu feter 200 euro. Aldò dla Jonta provinziela dëssel unì julà cun mascins che respetea l ambient. “La cumpëida de joi de trasport publich che unirà leprò dëssa unì cumpenseda cun na reduzion de joi per sport” à dit Durnwalder nunzian de ulëi ntervenì per smendrì nce i joi militeres.
as
