Jonta provinziela fërma 5% dl bilanz - tlausura
USP – Aspitan de audì n drëta sce la Provinzia de Bulsan messerà paië 120 milion de euro per judé l Guviern Talian a tré tres l’ultima manovra de sparani, à la Jonta provinziela (NCUEI) ai 30 de dezëmber fat ora de mëter sun na pert 5% dl bilanz 2012. Chisc scioldi ne possa nia unì mpeniei nchin che ne arà nia ndicazions tleres da Roma. – Tlausura dla Jonta provinziela ai 26 y 27 de jené.
L tenì sun na pert de 5% di scioldi prugramei per l 2012 reverda duc i capituli ora de l personal, l soziel y la sanità. “Chësc ie n pruvedimënt de precauzion per astilé ora dificulteies ntan i proscimi mënsc” à dit l presidënt Durnwalder tla cunferënza stampa do la senteda dla Jonta.
La manovra de sparani dl Guviern talian cumporta na liberalisazion te de plu ciamps, dantaldut tl cumerz y artejanat. Ciun pruvedimënc che sarà de bujën per mantenì l ativiteies tl Südtirol, uel la Jonta provinziela traté ntan doi dis de tlausura ai 26 y 27 de jené.
La mudazions che n se aspieta tl Südtirol per via dla liberalisazions cunedides da Roma, reverda dantaprima la Camera de Cumerz y l ciamp artejanel. “Sce l ne sarà nia plu debujën de vel ejam per fé n mestier artejanel, sce uni butëiga possa giaurì da cë ëura che la uel o sce gran ciadëines cumerzieles de auti o mubilia possa vënder alimenteres, pona manacions de avëi na gran cunfujion” à dit l presidënt Durnwalder do la senteda dla Jonta. La liberalisazions dl Stat arà nce cunseguënzes sun l cumerz ti pitli luesc y sun d’autri ciamps sciche l’urbanistica.
Nchin ala tlausura dla Jonta provinziela uniral ti assessorac provinziei analisà la cunseguënzes la liberalisazion sun la realtà economica tl Südtirol per pudëi pona lauré ora pruvedimënc aldò.
as
Galaria dales fotografies
Landeshauptmann Durnwalder über die Auswirkungen des Sparpakets der Regierung Monti
- Scarica il file audio 439 kb
