Chëutes sun i auti y l penzin: rujené cun l Guviern
USP – Sce la Provinzia de Bulsan nuzea si puscibltà de smendrì la chëutes sun l auto, iel da se aspité che de majera mprejes che mprësta auti ruve adalerch cun si sëntes. Chëstes unissa a mance tla regions ujines. L Stat à tla regions zënza autonomia straicà la pert dla chëuta sul penzin che ti va a provinzies y chemuns. Dla defrënzes danter regions y dla mudazions per la provinzia de Bulsan uel Durnwalder rujené te si ancunteda cun l presidënt di ministri Monti.
L chëuta provinziela de scrì ntëur auti ie da paië sce l vën vendù n auto, sce l vën cumprà n auto nuef o sce l vën fat na registrazion de ipoteca. L Stat ova udù dant de tò ju chësta chëuta per duta la regions, ma nia per chëles cun aministrazion autonoma. Chësta defrënza ova purtà pro che firmes dai auti, dantaldut chëles che da via i auti a leasing, se sposte tla provinzies cun manco chëutes sun i auti. L decret lege de dezëmber 2011 dl Guviern Monti ova n pert pruibì de tel defrënzes, ma ova mpo azetà che Bulsan y Trënt ebe na ezezion. Nsci iel pona nce unì dat pro tla lege finanziera dla Provinzia.
“Fajon cont che la reduzion provinziela de 20% sun la chëuta de scrì ntëur auti, porta tres la firmes nueves che vën adalerch feter 20 milion de euro de plu” à spiegà l presidënt Durnwalder. Ntant se à lascià audì i presidënc dla regions ujines ulache l vën a mancë la gran firmes che mprësta auti. La Jonta provinziela à fat ora che chësta situazion dëssa unì rujeneda ora tl’ancunteda de Durnwalder cun Monti.
Te chësta ucajion dëssel nce unì stlarì la cuestion dal chëuta sun l penzin. L decret de Monti vëija dant l auzé l chëuta (accise) sun penzin, gasuele, GPL y gas naturel, ma dal’autra pert al tëut ju la partezipazion dla regions y enc locai sun chësta chëuta. “Sce l vën fat l medemo nce per la regions autonomes, unissan a pierder feter 16 milion de euro” à dit Durnwalder, fajan dal’autra pert referimënt ala defrënza de chëutes y de priesc danter la regions. Per schivé che la jënt vede da na region al’autra, dëssa nce chësta cuestion unì stlarida cun l presidënt di ministri Mario Monti.
as
