Dat pro tl’ultima senteda dla Jonta provinziela
USP – Te si senteda da (NCUEI) ai 16 de jené à la Jonta provinziela dat pro na lingia de delibres. Tla cunferënza stampa do la senteda à l presidënt cunedì de plu argumënc de majer nteres.
La tlausura dla Jonta provinziela l’ena che vën, ai 26 y 27 de jené, unirà fata tl hotel Hochgall a Rein in Taufers. I argumënc de majera mpurtanza che unirà tratei ntan doi dis de senteda reverda la cunseguënzes dla manovra de sparani dl Guviern Monti y la liberalisazions. Vel argumënc ie bele unì metui al orden dl dì, i assessëures puderà n lunesc che vën mo purté dant d’autri argumënc.
A Burnech puderal unì fat 49 cuatieres per chiche à n davani mesan. La Jonta provinziela à azetà l program aldò per sustenì chiche uel se fé n cuatier y che à n davani massa aut per giapé l sustenì tlassich, ma massa bas per se cumpré n cuatier sul marcià liede. I assessëures ie nce stai a una che l IPES feje 64 cuatieres soziei a Burnech.
Culaburazion sëura la sëides danter la trëi provinzies Bulsan, Trënt y Tirol, dëssel unì mustrà tla gran ucajion dl’Expo 2015. La Jonta provinziela à tëut la dezijion de mascima de reprejenté l’Euregio che da vel mëns ie unida istituzionaliseda tla Grupa europea de culaburazion teritoriela (GECT/EVTZ), pra l’Expo a Milan. L pensier europeich de culaburazion sëura la sëides ulëssen nce prejenté n ucajion dla candidatura ala capitela europea dla cultura 2019.
Per l raion dai schi Plose possel unì fat n lech artifiziel da fé nëif. La Jonta provinziela à azetà la dumanda ala sozietà Plose. “Ti mënsc passei ie unì menà truepa descuscion zënza ruvé a una. Ma davia che n ne ie nia mesun mené inant l raion dai schi Plose zënza la garanzia de fé nëif, ons lascià pro de fé chisc lëures” à dit l presidënt Durnwalder fajan referimënt a vel cundizion de assegurazion y culaburazion cun l servisc de forestela.
as
