Gran descuscion dl Cunsëi provinziel dla scola per l’ena a 5 dis
USP - L Cunsëi provinziel dla scola se à (INIER) ai 16 de jené ancuntà per rujené ora l’unificazion dl calënder de scola. La se tratova de dé ju n bënsté che la Jonta provinziela adrova per pudëi tò na dezijion definitiva. La votazion finela ie jita ora contra la pruposta. Aldò dla descuscion dl Cunsëi provinziel dla scola, che à durà de feter cater ëura, se aspieten mo vel mudazion ala pruposta.
L’unificazion dl calënder de scola vëija danterauter nce dant l’ena de scola a 5 dis. Chësta reduzion dl’ena de scola ëssa dassù unì valiveda ora cun la reduzion dla feries da instà. Do na descuscion longia ie la maiuranza dl Cunsëi provinziela dla scola stat contra l pachetl de prupostes. La votazion ie jita ora cun 23 de contra, 9 per y sies astenscions. Ntan la descuscion, te chëla che à nce tëut pert i trëi assessëures ala scola, ie unì purtà dant de plu prupostes de mudazion, ma chëstes ne ie nia unides purtedes a votazion. Nsci iel nce unì fat la pruposta de nia fé valëi l’ena a 5 dis de ublianza per la scola auta ma de ti lascé la lidëza de crì ora nstësc.
I reprejentanc dla Scola Ladina à sustenì l’ena a cin dis per duc i livei de scola, dai mëndri ai majeri. N se aspieta na fazion positiva da pont de ududa pedagogich. La sada, canche l ne fossa pona nia scola, à i sculeies plu tëmp liede y tëmp per la familia. “Tl Lizeum d’Ert a Urtijëi ons bele fat de bona esperienzes cun l’ena a cin dis” à dit l assessëur provinziel ladin. Tla la scolines iel bele l’ena a cins dis, la mudazion che unissa a se l dé reverda n cajo me de finé l’atività vënderdi riesc do marënda, mpede domesdì. La mudazion ududa dant reverda perchël dantaprima la scola elementera y mesana. Mpede tenì scola de sada unissel fat un n domesdì de plu, sce la Jonta provinziela ne fej nia d’autra mudazions fossel udù dant de ndut doi domesdis tl’elementera y trëi tla mesana. “Sciche genitores messons dé prioriteies, y te chësc cajo muessa bën la furmazion vester al prim post” dij Mussner. Aldò dla descuscion pudëssel vester che uni scola auta possa nstëssa tò la dezijion sun l’ena de scola a cinch o sies dis.
Da pert dla Scola Ladina à l assessëur Florian Mussner purtà dant la pruposta de nia slungë l ann de scola ala fin per schivé dificulteies cun i ejams te chël tëmp ulache truepa families de nosta valedes fej feries. Per pudëi tré tres n’ena de scola a cin dis iel unì fat la pruposta de scumencé l ann de scola n’ena dant. “Da 34 enes ruvëssen nscila su a 35, mpede 36 coche n minova te n prim mumënt” spiega l ntendënt Roland Verra. A chësta maniera ne fossel nia plu debujën de tò demez la feries da carnescià. Per tré tres n ann de scola cun 35 enes da cin dis messessel n cajo unì smendrì la cumpëida generela d’ëures.
“Te d’autri raions vëniel bele laurà cun manco ëures, iló ai purempò drët de bon resultac n cont dl savëi di sculeies” dij l assessëur ladin.
as
