Politica | 18.01.2012 | 17:25

Presidënt dl’Austria Fischer anconta Durnwalder

USP – L ne ie mo nia ëura de dé alarm per via dl’Autonomia, ma de dé na nfurmazion a puntin: cun chësc pensier se à l presidënt dla provinzia Luis Durnwalder (NCUEI) ai 18 de jené ancuntà cun l presidënt dl’Austria Heinz Fischer a Viena. “Dan damandé aiut al’Austria, ulons a uni maniera purvé a fé udëi ite l senificat dl Autonomia a nosc presidënt di ministri Monti“ à dit Durnwalder.

Do l’ancunteda cun l Vizekanzler Michael Spindelegger (comunicat a pert) y na relazion sun l’Autonomia dl Südtirol dan la chemunanza austriaca per politica oradecà y la Union de Nazions, à Durnwalder pudù vester ghest dl presidënt dl’Austria Fischer tla Hofburg. I argumënc dl’ancunteda de feter n’ëura fova i medemi sciche da duman pra Spindelegger: dantaprima dla manovra de sparani Monti cun liberalisazions y la ferata per l Prëner.

N cont di programs de sparani à l presidënt dla Provinzia nfurmà sun la cunseguënzes per l Südtirol. “L ne se trata nia de dé alarm che l’Autonomia fossa unida atacheda” dij Durnwalder. Ël à plu che auter mustrà su i ciamps ulache l ie pericul y coche n miena de ti vester. La se trata dantaprima de ti fé udëi ite al presidënt di ministri Mario Monti dl senificat dl’Autonomia che ie nce lià ala costituzion. Chësc ie n duvier dla politica dl Südtirol. Me tl cajo che la tratatives ne jissa nia a bon fin ulëssen se ëujer a Viena. “Sce la ëssa propi da ruvé tan inant nes à l Bundespäsident segurà si sustëni” à dit Durnwalder do l’ancunteda a Viena.

Segondo argumënt ie stat l miuré dla linia dla ferata per l Prëner. Sun chësta cuestion à l presidënt dla provinzia mo n iede nfurmà l Bundespräsident sun la posizion dla Jonta provinziela, “che ie mo for de chëla che l ne ie deguna alternativa al tunel dl Prëner” nsci Durnwalder. L ie per ël da capì che l’Austria uel n cuntrol tecnich, ma dal’autra pert ne possa i lëures nia unì fermei. Fischer dëssa avëi segurà che l ne possa nia tò la dezijions dl Guviern, ma che l ie de chëla che acurdanzes nternaziuneles muessa nce unì tenides.