Materies di ejams de matura 2012 tla scoles ladines
USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. Tla scoles autes te Gherdëina y tla Val Badia se tratela de economia aziendela, rujenedes fulestieres y dessëni. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.
La materies per la segonda prova scrita dl ejam de matura ie śën seguredes a na maniera che i sculeis sebe plu avisa co se anjenié ca. Tla sezions per economia azendela di Istituc per l cumerz a Urtijëi y La Ila uniral damandà la materia de economia aziendela tla prova scrita. Cumëmbri dla cumiscion da oradecà puderà damandé i sculeies do la rujenedes tudësch, talian y dërt.
Tla sezion turistica y de rujeneda dla scola auta Raetia a Urtijëi messerà i candidac ënghe dé ju na prova scrita de rujeneda fulestiera. Nsenianc da d’autra scoles puderà damandé ora la materies tudësch, talian y conc/nfurmatica.
Tl Lizeum d’ert a Urtijëi vel, per duta sezions (ert tl lën, decorazion depënta y grafica de retlam), l dessëni per la segonda prova scrita. La materies talian y tudësch, elemënc de econmia y sociologia unirà damandedes da cumiscioneres da d’autra scoles.
Tl Lizeum linguistich a la Ila reverda la segonda prova scrita la rujeneda fulestiera. Cumisseres d’autra scoles puderà damandé tla materies talian, tudësch y conc cun fisica.
Tla scoles autes paritetiches ladines possa i candidac tla prima prova scrita crì ora danter tudësch y talian. La terza prova scrita ie metuda adum da doi pertes: n iede vëniel damandà cunescënzes te chëla rujeneda che ne ie nia unida crissa ora l prim di. Tla segonda pert muessa i maduranc respuender a na prova multidisziplinera che reverda de plu materies.
as
