Jonta te tlausura: svilup energetich y nuzé l refudam
USP – L daunì dla politica dl’energia ie tla tlausura dla Jonta provinziela stat un di argumënc tratei. N se à tëut dant de cumpré su la pertes che mancia mo dla Hydros y Hydropower. Sëuraprò à la Jonta nce abinà na puscibltà de finanziamënt per l mplant a Bulsan Sud zënza ne messëi auzé la tarifes dal refudam.
Nchinamò à la sozietà provinziela SEL feter 60% dla Hydros y Hydropower, la sozieteies che ie unides metudes su deberieda cun i gran cunzerns Enel y Edison. Śën uelen nuzé i mudamënc pra la gran sozieteies dal strom per ruvé pra i autri 40% che ti mancia mo al Südtirol. „On nciarià la SEL a nvië via la tratatives aldò“ à dit Luis Durnwalder (NCUEI) ai 27 de jené, do la tlausura. L cumpré de chësta azions dëssa nce unì nuzà per pité al zitadin y ai chemuns de fé pea l marcià dl strom y culaburazion sëura la sëides.
Te tlausura ie i assessëures provinziei nce ruvei pra na soluzion al finanziamënt dl mplant dal refudam a Bulsan Sud. La Provinzia ova mprestà su 85 milion de euro y ova fat cont cun de ndut feter 115 milion de euro per l frabiché che fossa pona te n segondo mumënt unì dat inant ai chemuns. Do che n fova ruvei a una, ova i chemuns dubità de vester boni de sëurantò i custimënc zënza auzé drë massa la tarifes dal refudam. „Deberieda cun i chemuns minons de avëi abinà na bona soluzion“ à dit l presidënt dla Provinzia fajan al savëi che la tarifes ne dëssa nia auzé plu che 10% permez a chëles che ie atualmënter a Bulsan.
as
