Tlausura: campania de nfurmazion sun l’Autonomia
USP - L 2012 ie l ann di anuei dl’Autonomia: dan 40 ani ie jit n drova l statut de autonomia nuef y dan 20 ani à l’Austria y la Talia sotscrì la fin dl stritoz. “La Jonta provinziela nvieia via te chësta ucajion na campania de nfurmazion per lecurdé i vantajes dl’Autonomia dl Südtirol“ à cunedì l presidënt Luis Durnwalder (NCUEI) ai 27 de jené do la tlausura dla Jonta provinziela.
Dan 40 ani, ai 20 de jené 1972 ie jit n drova l Statut de Autonomia maciadà ora tl „Paket“ y dan 20 ani, ai 19 de juni 1992 à i ambasciadëures UNO dla Talia y dl’Austria sëurandat la detlarazion dla fin dl stritoz al secreter generel UNO Boutros-Ghali.
Te 40 ani de Autonomia dl Südtirol se à mudà dassënn la sozietà, l’aministrazion, l panorama politich y la posizion politica dl Südtirol: „Nosta provinzia à ncuei l manco persones zënza lëur, degun debic y l prudot ntern lordo plu aut dla Talia. Ma l’Autonomia ie aldidancuei deventeda na cossa naturela per trueps, dantaprima per i jëuni, che ne pënsa nia plu do al senificat y che rejona me dl’Autonomia canche la semea de vester te pericul“ à dit l presidënt dla provinzia juntan che l ie sciot che trueps semea de nia se rënder cont di vantajes dl’Autonomia.
Ti proscimi mënsc uniral mustrà su la streda che n à fat te 40 ani y ulache n ie ruvei. La lecurdanza al 1972 y 1992 ne dëssa nia unì aviseda sun na manifestazion zentrela per l gran publich, ma sun na lingia de manifestazions, publicazions y pruvedimënc de cumpaniamënt che arjonj duta la vëtes dla populazion, dantaprima i jëuni.
Aldò dl presidënt Drunwalder iel prugramà n film cun stories da uni di, n DVD per scoles, na prejentazion web, na sëira de argumënc y n cudejel de nfurmazion per fulestieres. Per curì loces de nfurmazion y tò y jì pregiudizies no me pra i fulestieres, ma nce pra nosc ujins dëssel unì fat cunferënzes stampa a Viena y Roma. Chësc dëssa uni fat per ti prejenté l’Autonomia y l svilup atuel ai media naziunei taliani y dl’Austria.
as
