Jonta provinziela à dat pro la pruposta de lege sun la liberalisazions
USP – La Liberalisazion che l Stat à udù dant per ti de na sburdla al’economia naziunela à de majera cunseguenzes sun la situazion particulera dl cumerz tl Südtirol. La Jonta provinziela à perchël (NCUEI) ai 30 de jené dat pro na pruposta de lege che mët dant sëides a chësta liberalisazions. Nce i chemuns possa mëter dant limitazions aldò de si situazion.
La gran mudazions che purterà la liberalisazions de cumerz ie n pert n cuntrast cun l’Autonomia dl Südtirol. “L tumé demez de truepa lizënzes, planns de cumerz, i orars de giaurida dla butëighes, butëighes te majeri magasins o la sales dai juesc ie n valgun ejëmpli de ciamps che se muderà. L decret Monti vëja nce dant limitazions da pert dl’aministrazions locales y chësta puscibltà ulons nce nuzé” à dit Durnwalder do la senteda dla Jonta. N se stizerà tlo dantaprima sun ciamps sciche la segurëza tl lëur, la sanità, la defendura de ambient y natura o di raions urbanisei. “Chësta limitazions ons tacà pro a n regulamënt nuef per l cumerz a na maniera da nia lascé pro na lidëza de fin y n chaos” à dit l presidënt dla Provinzia.
Raions tlassifichei sciche vërt agricul dëssa unì stravardei lascian pro tant che fova nchinamò lascià pro. Per ejëmpl dl vënder prudoc fai nstës, butëighes pra la plazes da golf o pra stredes dala rodes. Nchin a 30 dis do l jì n drova dla lege, dëssel vester mesun pruibì cërta ativiteies contra l nteres dla populazion. “Te chësc cajo pudëssen fé referimënt ala defendura contra la fuera o l muvimënt de streda. Chësc valëssa nce per orars de giaurida o discoteches te raions cun truep cuatieres” à dit Durnwalder.
Aldò dla pruposta dla Jonta provinziela dëssa i chemuns pudëi mëter dant l’ativitieis che ne ie nia lascedes pro te vel ciamps. La lege dëssa vester na basa aldò de chëla che chemuns y Provinzia possa ntervenì. La pruposta muessa unì data pro te Cunsëi provinziel nchin ai 23 de merz a na maniera che la vën ora mo dan la lege naziunela dla liberalisazions.
as
Galaria dales fotografies
Landeshauptmann Durnwalder zum Liberalisierungsgesetz
- Scarica il file audio 1486 kb
