Ancunteda cun Monti (1): model nuef de finanziamënt dl Südtirol
USP – La Provinzia ie a desposizion per sëurantò l pëis finanziel che l Stat porta te Südtirol, la se damanda na garanzia per l’Acurdanza de Milan y che l pëis de ressané la finanzes stateles vënie spartì su a na maniera plu giusta. Tl’ancunteda dl presidënt dl ministri Mario Monti cun i doi presidënc dla provinzies autonomes de Bulsan y Trënt, (NCUEI) ai 02 de fauré a Roma, iel unì tratà la fundamëntes de chësc model de finanziamënt.
“Ne son nia unic per damandé privileghies, ma l respet per l Statut d’Autonomia. L dialogh danter l’Autonomies y l Stat ne dëssa nia jì tres recursc ma sun la basa dl’acurdanzes”, chësc ie stat l pensier dl presidënt Luis Durnwalder te si prima ancunteda tl palaz Chigi cun l presidënt di ministri Mario Monti. Cun l’ancunteda de feter n’ëura iel unì nvià via tratatives sun l finanziamënt dl’Autonomia che jirà bele i proscimi dis inant a livel politich y tecnich. Sëuraprò a Monti y i doi presidënc de provinzia, à nce l minister per i raporc cun l Parlamënt Piero Giarda, l vizeminister per l’economia Vittorio Grilli y l sotsecreter ala presidënza dl Cunsëi, Antonio Catricalà tëut pert al’ancunteda.
L presidënt Monti à stlarì si mpëni a respeté l’urdenanza istituzionela particulera dla provinzies autonomes ududes dant dal Statut. “L nes à dit che deguni ne uel tuché tant che ti ie unì recunesciù al’Autonomia – à cuntà Durnwalder – y da nosta pert ons dit de ulëi fé nosta pert aldò de n prinzip de respunsabltà n cont de regules dl’Autonomia y criteries de valivanza”. Durnwalder y Dellai à lecurdà chël che la Provinzies à bele fat per ressané la finanzes stateles: “Tres l’Acurdanza de Milan, paia la Provinzia de Bulsan bele 518 milion de euro al ann” à dit Durnwalder. Tant che ie dopro unì damandà de scurté aldò dla defrënta manovres, fej ora 611 milion tl ann 2012. I ultimi pruvedimënc ie unic udui dant ala medema maniera per dut l raion naziunel, y ne ie aldò di presidënc de pruvinzia, nia n linia cun l Statut d’Autonomia che vëija dant n'acurdanza y l jì a una cun la cumpetënzes dla Provinzies. “Monti à dat pro che l bujën de tò riesc pruvedimënc ti ie passà via al tratatives cun l’Autonomies, ma śën possel unì marciadà per ruvé a n’acurdanza sun l finanziamënt.”
Durnwalder y Dellai ti à sëurandat al presidënt n documënt cun usservazions y prupostes per seguré i raporc finanzieres danter Autonomies y Stat cun l cuntribut per jì a ega cun l bilanz. L model de finanziamënt purtà dant vëija dant manieres nueves de raport tenian cont dl aiut per ressané la finanzes stateles che n à damandà ala provinzies. Danterauer sëurantulëssa la Provinzies custimënc dl Stat, l ie unì damandà l respet dl’Acurdanza de Milan cun na norma finanziera spezifica y ajurnamënc, la definizion dla cumpetënzes provinzieles sun chëutes y acurdanzes n cont dl sistem de chëutes y dl pat de stabilità.
A Monti ti iel nce unì prejentà l’idea de sëurantò da pert dla doi provinzies l custimënt dl Stat tl raion provinziel. Cuncretamënter iel minà che la Provinzies sëurantulëssa l custimënt de funzions stateles y dal’autra pert ne messësseles nia judé a paië pea debic dl Stat. “L’ancunteda à abù na nota drët rëidla y de utl ajache on n Guviern tecnich che ie a desposizion per rujené de argumënc de autonomia y de nvië via tratatives sun na basa nueva. Sce chësc vester davierc vën mantenì, ons de bona pusciblteies per na bona culaburazion tl daunì” à dit Durnwalder.
as
Galaria dales fotografies
Landeshauptmann Durnwalder zu den Ergebnissen des Treffens mit Ministerpräsident Monti
- Scarica il file audio 1197 kb
