Berger a Roma damanda la librazion-IMU dla uties da mont
USP – Cun la ntroduzion dla chëuta sun la puscions IMU dëssel nce unì registrà i tublei y la uties da mont. La regions se à (NCUEI) ai 2 de fauré posizionà contra chësta ulentà dla Guviern. “Son ruvei a una de damandé de fermé chësta ulentà per abiné deberieda cun l Guviern na miëur soluzion” à dit l vizepresidënt Hans Berger do la senteda a Roma.
Berger à tëut pert ala cunferënza dla regions per crì na streda deberieda da scunjeré la registrazion tl cataster di pitli frabicac da mont su. Aldò de Berger ne se tratela nia de taië ora i paures dala chëuta IMU: “La ne se trata nia de abitazions, no de frabicac per l lëur da paur y nianca de frabicac per feries tl luech da paur”. La se trata dla pitla uties y tublei da mont che ne ie nchinamò nia unic registrei tl cataster per pudëi calculé la chëuta.
La registrazion cumpurtëssa n gran mpëni burocratich ajache l se trata de 30.000 frabicac. La ne va nia me di ufizies dl cataster, l va nce debujën di planns di frabicac nstësc, co che i ie n cajo spartì su y d’autra documentazions tecniches. La registrazion de n tublà o utia da mont unissa a custé feter 2000 euro. “Sce n calculea chësc custimënt sun 30.000 frabicac, ruven sun n custimënt generel de 60 milion de euro, me per avëi la basa de calculé la chëuta IMU” dij Berger.
La chëuta nueva dëssa unì calculeda sun l davani catastral, ma chësc ie pra i frabicac da mont plutosc bas, y nce la chëuta fossa do la rata bassa. “La ntredes per l Stat ne fossa nia n relazion cun l custimënt” dij l vizepresidënt. Da chësc pont de ududa l vëij nce l’autra regions. Nsci iel a Roma unì fat ora de damandé tratatives cun l Guviern. Ntant dassëssa la regula dl IMU y dla registrazions tl cataster unì spënta.
as
