Jonta provinziela uel seguré stieres – festide per l daunì
USP – Tenian cont dla situazion economica atuela ti cëla i assessëures cun festide al daunì dla stieres, dantaldut per i jëuni. Davia che la situazion ie dut auter che da tò ala lesiera, uelen riesc tò su cuntat cun l’Università y la Camera de cumerz per udëi deberieda cie che se lascëssa fé.
“Sce n ti cëla al svilup economich de chisc ultimi tëmps, muessi di che me tëmi per nosc marcià dl lëur y che la cuota di zënza lëur auze nce da nëus” à dit l Luis Durnwalder, (NCUEI) ai 06 de fauré te cunferënza stampa. Da una pert iel bele 6 - 7% di jëuni che ne à nia na stiera y dal’autra pert iel per ejëmpl a Bulsan Sud truepa firmes che ne lëura nia plu al plën die si capaziteies. I assessëures provinziei a sorissà l bujën de n majer sustëni per l’economia y de ruvé a na maniera per fé lauré la strutures ti raions de produzion che ie n pert uetes. “La cuota di zënza lëur ie te chësc mumënt mo al 2%, sce aspiton che la ruve su al 6%, sciche te d’autra realiteies, pona saral massa tert” à dit l presidënt dla Provinzia.
La Jonta provinziela uel te ancuntedes cun l’Università y la Camera de Cumerz udëi ulache n pudëssa fé pruvedimënc per seguré stieres. Aldò dl presidënt dla Provinzia iel da tenì cont che l unirà manco scioldi da Roma y che i cuntribuc provinziei puderà me plu unì dai ora a na maniera plu spezifica. Nce ti raions ntëur l Südtirol ne vala economicamënter nia bën y chësc à nce cunseguënzes sun la relazions cumerzieles cun nosc raion. Firmes da oradecà à te chësc mumënt puech mpuls per unì a giaurì filieles tl Südtirol.
as
