Jonta provinziela: pusciblteies nueves per ti tenì permez ala liberalisazions
USP – Do che l presidënt dla Provinzia se à ancuntà cun l presidënt di ministri a Roma, à la Jonta provinziela (NCUEI) ai 06 de fauré fat ora de ulëi adaté i pruvedimënc per se paré dala liberalisazions. Tla proscima senteda uelen se mëter a una cun reprejentanc dl cumerz y di chemuns sun co jì inant.
Aldò de ultimi studi y bënsteies che la Jonta provinziela à giapà ite ne iel nia tler defin sce la Provinzia muessa avëi njenià la lege dan l 23 de merz o sce la va mo nchin de juni. “Son dla minonga de ne pudëi resië nia y perchël ulons stlù ju la lege provinziela nueva sun l cumerz nchin ai 23 de merz” à dit l presidënt Luis Durnwalder riesc do la senteda. Aldò de esperc dëssel per ejëmpl vester mesun regulamenté i orars de giaurida dla butëighes, dal’autra pert vala nce de tenì cont dla medema cundizions per butëighes te n majer raion.
Per la senteda de n lunesc che vën uniral nvià reprejentanc dl’assoziazion di buteghieres HDS y dla lia di chemuns per stlarì la pusciblteies y se mëter a una de co jì inant. Da pert di chemuns ne iesen nia cuntënc de messëi nstësc mëter dant cundizions ai raions de cumerz, ajache ti raions che ie sun sëida pudëssel unì ora majera defrënzes y nsci tratamënc desvalives. Nchin ala proscima senteda dla Jonta provinziela laurerà nce i tecnics inant sun chësta tematica.
as
