N vijita ala provinzia-tlima: Jonta provinziela sustën l culegamënt di proiec de ejëmpl
USP – L’efizienza energetica, funtanes de energia alternativa y l culegamënt danter i ciamps dl’energia ie tl Südtirol unic cuncretisei de plu che te d’autri raions. Per mustré su chësta posizion danora, à la Jonta provinziela (NCUEI) ai 06 de fauré dat pro de sustenì l culegamënt danter i proiec de ejëmpl te forma de na raida de vijites - Klimatour per grupes.
La Jonta provinziela se à tëut dant nchin l 2050 de fé deventé l Südtirol na provinzia-tlima. Cun na strategia dl tlima dëssa la produzion de anidrida de carbonium unì smendrida da 5,1 tones a 1,5 tones per persona. Śën se à la Jonta dat ju cun n cunzet generel per mëter a jì vijites de proiec de ejëmpl n cont de efizienza energetica y proiec che vel tl tëmp. “Ulessan pité raides de vijites ulache n possa udëi n pue’ de dl dut, dala produzion de idrogenn a mplanc che se nuzea dla biomassa, l frabiché sparanian energia o mplanc fotovoltaics” à dit l presidënt dla Provinzia do la senteda dla Jonta.
L culegamënt tres na raida de vijites ne purtëssa nia me retlam per l’economia y la raion Südtirol: aldò de Durnwalder ëssel nce n potenzial turistich. Ël se nmagina che l pudëssa nce unì tëut ite l frabicat nuef dla firma Hafner, la deponia dal refudam Kaiserberg a Sigmundskron, l mplant de idrogenn a Bulsan Sud, la fiera de Bulsan y l’Ecocenter. De ndut danter 20 y 30 zëntri. La bona de chësta idea ie de pudëi se nuzé da na lingia de strutures che ie bele y che la realisazion dla raida de vijites ne cumpurtëssa nia n gran custimënt.
as
