Culaburadësses dla scolines mpera dutes deberieda
USP – Duta la maestres dla scolines ladines, assistëntes pedagogiches, praticantes y nce vel educadëssa n maternità à (NCUEI) ai 10 de fauré fat pea l di pedagogich a Urtijëi, dedicà al argumënt de rafurzé i mëndri y svilupé ressorses.
Feter 120 educadësses dla scolines ladines ie ruvedes adum tla Scolina Salieta per mparé dutes deberieda velch leprò n cont dla fundamëntes dl svilup di mëndri tl’età dla scolina. La prufessëura Renate Zimmer dl Universiteies de Osnabrück y Persenon à metù a cuer che la se trata bele ti prims ani de vita de nuzé ucajions per svilupé n cunzet positif de se nstësc. Sce la mutans y i mutons possa fé velch y arjonjer nce velch, feji n’esperienza de suzes cun si corp. Chësc ie de mpurtanza zentrela per l svilup persunel. „Tl di pedagogich se tratel per l’educadësses dla scolina de mparé chisc prinzipies per pudëi pona nce ne n tenì cont tl lëur da uni di“ spiega l’ispetëura Edith Ploner. La prufessëura Zimmer à a Urtijëi nce metù a cuer de nzé l’ucajions da uni ulache i pitli possa fé esperienzes positives de si capaziteies fisiches. Nscì ala nce fat ejëmpli cuncrec sciche chël dl mënder che muessa balanzé via per na stangia: „n dëssa permò ti dé la man canche i l adrova, ma nia bele a muever“.
N segondo argumënt de mpurtanza zentrela propi per la scolina ladina che lëura cun de plu rujenedes, ie stat l nrescì de rujeneda tres l corp. Rujeneda, nscì la prufessurëssa Zimmer, vën sëntida tres l corp y l muvimënt. Esperienzes tl’età dla scolina à n gran pëis per l svilup di mëndri.
L di pedagogich ie la sëula ucajion ntan l ann ulache duta l’educadësses fej na furmazion deberieda. I argumënc tratei chëst ann ie culeghei al argumënt dl ann „mëndri stersc, rafurzé i mëndri“.
La direzion dla scolines ladines à ulù nuzé chësta ucajion per sëurandé n zertificat a cater educadësses che à fat n ajurnamënt de furmazion musichela. Silvia Mussner, Valeria Pescollderungg, Valentina Fontanella y Miriam Esther Costabiei à ntan i ultimi doi ani fat 250 ëura de furmazion stlujan ju cun n lëur scrit y n’ejam a usc tla facultà dla scienzes dla furmazion, tl’università a Persenon. Ëiles ie deventedes espertes de furmazion musichela per i pitli y piterà ativiteies spezifiches y furmazion per si coleghes de lëur.
as
