Jonta provinziela fej recurs al decret Monti
USP – Te cater ponc se pera la Jonta provinziela contra l prim decret de sparani da pert dl Guviern Monti. Da Bulsan se peren contra l dërt dl Stat de tò ite per ntier la chëutes spezieles, contra la nueva chëuta per puscions IMU, contra l macë de n’acurdanza sun la pert che l Südtirol dëssa paië y contra la mpustazion de smëndrì i cunsëies de aministrazion dla strutures publiches.
Do avëi analisà plu a puntin l prim pachetl de reformes dl Guviern Mario Monti, à la Jonta provinziela (NCUEI) ai 13 de fauré tëut la dezijion de fé recurs dan la suneria costituzionela sun cater ponc. La prima cuestion reverda l dërt che l Stat se à resservà sun la chëutes spezieles. A Roma iel unì udù dant che dut chël che vën trat ite tres la chëutes spezieles per ressané l bilanz statel, vede tla cassa dl Stat. “Chësc ne respetea nia l prinzip che 90% dla chëutes paiedes tl Südtirol ruve inò de reviers tl Südtirol” à dit l presidënt Luis Durnwalder. A Bulsan ne vëniel nia azetà che l Stat ti scurta ntredes ala Provinzia, se damandan plu scioldi, y ne lascia nia tò pert ala chëutes nueves.
La segonda cuestion per chëla che l vën fat recurs reverda la chëuta chemunela sun la puscions IMU. L Stat se damanda che i chemuns debe ju l mez dl minimum udù dant per chësta chëuta nueva. “Davia che la Provinzia porta la respunsabltà per l finanziamënt di chemuns dl Südtirol, nes vëniel damandà de paië doi iedesc ajache nëus messessan curì l busc di chemuns” à dit l presidënt dla Provinzia.
La Jonta provinziela se pera nce contra l majer scudì pra la regions autonomes. Aldò dla desposizions da Roma muessa chëstes paië 860 milion de euro per judé a ressané la casses stateles. “La Provinzia de Bulsan vën a paië danter 120 y 130 milion de euro, scebën che l ne ie nia unì marciadà cun nëus y l ne ie bën gor de no ruvà a n’acurdanza sciche udù dant dal Statut de Autonomia” à dit l presidënt dla Provinzia.
L cuarto pont ie plutosc de carater giuridich. L Guviern Monti se damanda de smendrì i cunsëies de aministrazion dl’aziendes publiches. “Chësc se ans nce nëus bele tëut dant te chëi caji ulache l ie nce da fundamënt” à dit l presidënt. La Jonta provinziela ne azeta nia che l Stat scrije dant de tel reduzions canche l ie cumpetënza dla Provinzia de numiné chisc cunsëies de aministrazion.
as
Landeshauptmann Durnwalder zur Anfechtung des Sparpakets der Regierung Monti
- Scarica il file audio 1111 kb
