Dat pro dala Jonta: deponia dal refudam, aiuc per la nëif, plann di purtoies, svilup tl'Africa.
USP – Te si senteda da (NCUEI) ai 13 de fauré à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres.
Nrandì de prëscia la deponia dal refudam
La deponia dal refudam a Pfatten ie tosc plëina y nsci muessela unì ngrandida de prëscia. La lerch a desposizion tleca nchin feter mez 2013. Sce l ne vën nchin ntlëuta nia anjenià na majera lerch, muessa l refudam unì menà oradecà y chësc cumporta n gran custimënt. Mo ntan chësc ann dëssel unì fat nvestimënc per doi milion de euro. Chisc scioldi muessa unì abinei ca da d’autri capituli. Nchin ala proscima senteda dla Jonta messerà i assessëures Florian Mussner y Richard Theiner prejenté na pruposta co mëter a jì chisc scioldi a na maniera de pudëi prësc scumencé cun i lëures. De ndut vën la deponia a custé diesc milion de euro.
Aiuc per ti vester ala nëif
Nchin a 2,5 metri de nëif à purtà majeri problems te gran pert dla Talia zentrela. Ntan i ultimi dis à for inò presidënc de regions i provinzies damandà n aiut al Südtirol. Nchinamò iel bele unì mandà 30 lauranc cun 30 mascins a judé a rumé la nëif tla regions Marche, Toscana y Emilia Romagna. La Jonta provinziela à (NCUEI) ai 13 de fauré fat ora de mandé mo cater scuadres cun mascins aposta tla Talia zentrela. L ne se trata nia de dependënc provinziei, ma de servijes cumprei da firmes privates.
Azetà l plann di purtoies a Sexten
La cuestion de culeghé i raions dai schi Helm y Rotwand a Sexten ie inò ruveda sun mëisa dla Jonta provinziela. I assessëures se à tenì ala dezijion dl Chemun y à azetà la mudazion al plann di purtoies che lascia pro l culegamënt di doi raions.
Cuntroi di proiec de svilup tl’Africa
Per diesc dis alalongia jirà l presidënt Luis Durnwalder deberieda cun i assessëures Hans Berger y Richard Theiner tl Africa per cialé do i proiec de svilup sustenii dala Provinzia. N juebia grassa, 16 de fauré, uniral muet de vies de Burkina Faso, Mali y Kapveden. La Provinzia à dat gran pëis ala culaburazion de svilup per Burkina Faso, un di raions plu pueresc a livel mundiel. Tlo iel bele unì fat nvestimënc per doi milion de euro. Per via de chësc viac ne fajerà la Jonta provinziela n lunesc che vën deguna senteda.
as
