Programs de stredes y frabiches per passa 200 milion
USP - La Jonta provinziela de Bulsan à dat pro i programs di lëures publics da chëst ann. Sun pruposta dl assessëur Florian Mussner iel (NCUEI) ai 27 de fauré unì dat pro 98 milion de euro per frabiché stredes, 45 per mantenì stredes y 65 milion per frabiches.
La dezijion sun l program di lëures publics à l presidënt dla Jonta provinziela mutivà cun l dé da lëur ala firmes y l purté inant de lëures y proietazions bele nviedes via. Feter mesa la soma de 98 milion de euro per la stredes unirà adurveda per jì inant cun lëures bele scumencei. “Feter 22 milion iel udù dant per la zircunvalazion de Maran, feter 18 milion per chëla de Leifers y feter 10 milion per astilé ora l zënter de Auer” à dit Luis Drunwalder te cunferënza stampa. Tl program dl 2012 iel nce udù dant doi lëures nueves: l unirà scumencià l terzo lot dla streda dla Val d’Ega y l segondo lot dla zircunvalazion de Vandoies. Cun de mëndri custimënc uniral fat na gran cumpëida de mëndri nvestimënc. L presidënt à danterauter nunzià la streda per furné ora dla zircunvalazion de Burnech da pert de Ràiscia y ntervënc sun la streda dl Stelvio.
Per i proscimi ani à la Provinzia bele dat pro proiec per 725 milion de euro. “Sce l sarà mesun mantenì la despunibltà finanziera, ons per i proscimi 6-7 ani bele prugramà i lëures” à dit Durnwalder.
N cont de frabiches à la Provinzia bele dat pro proiec per 405 milion de euro. Chëst ann uniral frabicà per 65 milion de euro. N lëur che ie prugramà per duta trëi grupes de rujeneda reverda l zënter bibliotecher a Bulsan: “ulon scumencé mo chëst ann, sce l Chemun abina na lerch alternativa per la scola che ie te chësta strutura” à dit l presidënt dla Jonta provinziela. I majeri lëures reverda la scola prufesciunela Einaudi, na palestra a trëi pertes Walther von der Vogelweide, l istitut cumerziel Kuntner, la scola da geometer Anich y l zënter tecnologich y de inuvazion TIS.
Per l mantenimënt de stredes, puenc y tuniei à la Jonta dat pro l program 2012 che vëija dant n custimënt de ndut feter 45 milion de euro.
as
Galaria dales fotografies
Landeshauptmann Durnwalder zum neuen Bauprogramm
- Scarica il file audio 1113 kb
