Provinzia tën da la sia n cont dla lege finanziera
USP - L Guviern talian à cuntrastà la lege finanziera dla Provinzia de Bulsan te de plu ponc. La Jonta provinziela à (NCUEI) ai 27 de fauré fat ora te tenì dala sia y de ulëi tenì permez ai recursc. La se trata danterauter dl’esenzion dla njonta IRPEF, na mëndra chëuta sun i auti y l colaudo di camions.
Te si ultima senteda de fauré ne à la Jonta provinziela mo nia delibrà avisa sun ciun articuli che la uel se lascé ite te n stritoz dan la Chëurt costituzionela, ma sun vel pont ala bele tëut na dezijion. Nscì uel i assessëures che i patrons de camions posse fé l colaudo pra de plu berstotes y nia me zentralmënter a Bulsan. “Chësc fossa scialdi plu scëmpl, sparaniessa custimënc y viages” à dit l presidënt dla Provinzia, “ajache te chësc ciamp ons la cumpetënza y perchël se lascerons ite tl stritoz”.
La Jonta provinziela uel nce tenì dur sun l’esenzion dla njonta IRPEF per families cun n mënder davani. “La Chëurt costituzionela à bele fat na sentënza te chësc ciamp, perchël ne iel nia da capì che l Stat fej tlo mo n iede na cuntestazion” à dit Durnwalder. Nsci iela nce per la reduzion dla chëuta sun i auti.
Per doi d’autri ponc iel mo debujën de stlarimënc. Un reverda l mëter adum de direzions provinzieles cun chëles de istituzions, l’auter pont reverda la cunzescions dal’ega per fé strom. La Provinzia ova tlo udù dant che l muessa unì mustrà su la despunibltà de pudëi passé tla puscions cun la roles dal’ega. Da pert de Roma iel unì fat recurs a chësta pert.
Tla proscima senteda dla Jonta provinziela uelen sun la basa de stlarimënc fé la delibra ufiziela per se paré dai recursc ala lege finanziera.
as
