Jonta provinziela uel mo marciadé per l’autostreda
USP – Ajache la se trata de belau 200 milion de euro, uel la Provinzia plu gën renunzië a slungë la cunzescion per l’autostreda dl Prëner – per chësta rejon uel la Jonta provinziela mo purvé a marciadé cun l Guviern talian. Chësta posizion ie unida tëuta ite (NCUEI) ai 27 de fauré tla senteda dla Jonta provinziela.
Tl decret tlamà “Milleproroghe” iel nce stat mesun junté na pert che reverda l slungë dla cunzescion dl’autostreda nchin ala fin de chëst ann. “Chësc fossa de prinzip na bona cossa, ajache l nes dajëssa la puscibltà de traté per n cuncors o alternatives” à dit Luis Drunwalder te cunferënza stampa. Manco bones ie la cundizions che l Stat mët dant per chësc slungë.
N iede messessel unì paià ite 70 milion de euro sciche chëuta de cunzescion. L Stat fej pona cont cun n valor de 568 milion de euro, l calculan sciche avëi tl bilanz sun la basa de capituli che i azioneres publiches (sciche la Provinzia) dëssa junté te si pat de stabilità. A chësta maniera messëssa la Region, y la Provinzies de Bulsan y Trënt auzé si somes. “Te chësc cajo unissan a paië mo 120 milion per via dl pat de stabilità” à dit l Durnwalder.
Cun de ndut feter 200 milion de euro uel la Jonta provinziela plu gën renunzië n tel slungë dla cunzescion. “Purveron de ruvé tan inant da pudëi marciadé cun Roma per via de chësta cundizions dl slungë” à dit l presidënt dla Provinzia.
as
