Jonta provinziela: program Astat, Conservatorio y ena de scola
USP – Te si senteda da (NCUEI) ai 27 de fauré à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce l program de lëur dl Astat, lëures de ressanamënt tl Conservatorio y la posizion n cont dl’ena de scola a 5 dis.
L program dl ASTAT per i proscimi trëi ani, dat pro dala Jonta provinziela, reverda na lingia de argumënc. L Istitut provinziel de statistica fajerà feter 100 nrescides te duc i ciamps dla cumenanza. Nsci uniral nce fat studi sun la cumpëides dla persones zënza lëur y sun l davani. Sun l program iel danterauter nce na nrescida sun l adurvé di media tl Südtirol.
Per lëures de prëscia tl Conservatorio a Bulsan iel unì dat pro 4,1 milion de euro. Cun l passé dl conservatorio dal Stat ala Provinzia, se à l assessorat ai lëures publics nce cruzià de chësta strutura. Per n ressanamënt dl conservatorio fejen cont cun n custimënt de 17,1 milion de euro. Chësc nvestimënt ne possa nia unì fat dut te un iede. Nsci à la Jonta provinziela dat pro de fé n iede i lëures de majera prëscia.
Na delegazion di nsenianc dla scoles de mujiga se à ancuntà cun l presidënt Durnwalder per via dl’ena de scola a 5 dis. I maestri à festide che cun la partizion nueva ne iel nia plu tëmp per l nseniamënt tla scoles de mujiga. L presidënt dla Provinzia à da si pert segurà che l ne unirà nia plu mudà la dezijion per l’ena de scola a 5 dis. La singula scoles possa nstës mpartì l’ena a na maniera da avëi un, doi o trëi iedesc domesdì scola. De cunseguënza resta nce l tëmp a desposizion per jì ala scola de mujiga. La medema autonomia de scola garantësc nce na dezijion da cajo a cajo per mujiga sciche materia opzionela de ublianza. L nseniamënt tla scoles de mujiga de sada danmesdì ne sarà aldò dl presidënt nia da schivé.
as
