Cunsulta provinziela ladina cëla do plu avisa
USP – Te si prima senteda dl ann à la Cunsulta provinziela per la Cultura ladina scumencià a valuté la dumandes per cuntribuc mo plu avisa. La cunseguënzes di pruvedimënc de sparani dl Stat talian se lascia nce sentì sun la Provinzia y de chësc muessel nce unì tenì cont a partì cuntribuc provinziei.
La cumpëida de dumandes per cuntribuc provinziei per ativiteies cultureles ladines ie chëst ann inò cresciuda. Nchin ala fin de jené iel unì dat ju 90 dumandes per curì l custimënt de ativiteies cultureles. Permez ala mesaria di ultimi ot ani ie chësc n aumënt de 27%. “Sce ultimamënter iel for de plu lies y assoziazions che damanda n cuntribut iel nce sëni che l vën fat de plu atività culturela ladina” se ncunforta l assessëur Florian Mussner. Me permez al ann passà iel stat n aumënt de 12,5% dla dumandes per ativiteies.
La Cunsulta ladina à sëuraprò nce valutà la dumandes de sustëni da pert de artisć y di chemuns. Per valuté de ndut 113 dumandes iel stat debujën de doi sentedes. Chësc nce ajache la situazion economica dl’aministrazion publica se damanda de cialé do la dumandes mo plu avisa y valuté a puntin. N mierculdi ai 22 de fauré à la Cunsulta provinziela per la Cultura ladina de ndut azetà 90 dumandes de cuntribuc per na soma de 341.250 euro. Dla 14 dumandes per nvestizions nen iel unì azetà 11. La dumandes de 7 artisć ie dutes unides azetedes. De 90 dumandes per ativiteies cultureles à 72 giapà na valutazion positiva. Per l’autres iel mo debujën de vel stlarimënt.
Te chësta prima senteda dla Cunsulta ladina iel unì dat priorità al’atività culturela ladina. L sustëni per proiec straurdineres y nvestimënc unirà valutà tla proscima sentedes, nce ajache ntant possel mo unì fat dumandes per chësta sort de cuntribuc.
La Cunsulta à mplu tratà l cajo di cuntribuc dai pro ti ani passei, ma che ne ie mo nia unic paiei ora. “Pudon permò paië ora canche giaton la documentazion dla spëises. Te chisc caji depëndel perchël da chëi che à damandà i cuntribuc” spiega l assessëur provinziel ladin. Da pert dl Ufize per la Cultura Ladina uniral proscimamënter tëut su cuntat cun la lies per stlarì chisc caji.
L’atività culturela à na funzion mpurtanta per la cumenanza di luesc, nsci ulëssa la Cunsulta nce sensibilisé i chemuns a sustenì chësta ativiteies.
as
