Aministraziun | 28.02.2012 | 16:08

Cunvëni sun la segurëza de nfurmazion: seguré i servijes

USP - Tl passé da na aministrazion baseda sun documënc de papier a formes digiteles, à la segurëza de nfurmazion na mpurtanza zentrela. Te chësc cuntest se tratela nce de garantì servijes digitei da pert publica – n argumënt che ie (NCUEI) ai 28 de fauré unì tratà da esperc ntan n cunvëni dla repartizion provinziela de nfurmatica y la Südtiroler Informatik AG.

Feter 170 reprejentanc de duta l’aministrazions, danter Provinzia, Comuniteies de raion, chemuns, suneries, militer y polizai dla finanzes o istituzions de sanità, se ancuntà tl zënter TIS a Bulsan per se dé ju cun trends nueves dla segurëza de nfurmazion. L pont zentrel ie stat chël de dé respostes a co che servijes dla tecnica de nfurmazion possa nce unì garantii canche vën a mancë strom o tl cajo de catastrofes natureles.

L cunvëni ie unì giaurì dal presidënt dla Provinzia Durnwalder che à sorissà l mpëni dla Jonta provinziela de ruvé a n’aministrazion digitaliseda: “Nes on sëurantëut l duvier fé dut l puscibl per sparanië burocrazia y custimënc, y de miuré l cuntat danter zitadins y aministrazion”. Tl medemo mumënt uel la Provinzia nce seguré cuntac tl plën dla segurëza. Tla paroles danora iel nce unì nunzià che la garanzia de segurëza ti dà nce crëta al zitadin. Mudamënc cumporta nce custimënc. “Chisc custimënc ne dëssa nia unì udui sciche n pëis, ma sciche n nvestimënt tl daunì” à dit Kurt Pöhl, diretëur dla repartizion provinziela de tecnica dla nfurmazion. 

La segurëza de nfurmazion ne ie nia me de autalità per si cuntenuc ma nce da pont de ududa giuridich. Ti proscimi mënsc muessa duta l’autoriteies prejenté n Business-Continuity-Plan, n plann che mostra co che i servijes vën mantenì nce te caji d’emergënza. Chisc planns muessa unì azetei dal autorità statela DigitPa.

Tl Südtirol iesen te chësta cuestion bele n var inant. Chësc à i partezipanc dl cunvëni nstës pudù udëi canche i à vijità l Data center dl’aministrazion publica ulache ruva adum la nfurmazions dla Provinzia, Comuniteies de raion, Chemuns y l’unità sanitera. Chësc zënter ie tla sënta dla Südtiroler Informatik AG y ie unì fat aldò di criteries de segurëza, de frabiché y de ambient che muessa unì respetei te cuestions de Business Continuity.

as

Galaria dales fotografies

Feter 170 reprejentanc de de plu aministrazions à mustrà nteres per l cunvëni sun la segurëza de nfurmazion;