Cuntribut al marketing turistich: ancunteda cun assoziazions economiches
USP – Te n’ancunteda cun reprejentanc dl’assoziazions economiches à l presidënt dla Provinzia Durnwalder cun i assessëures Berger y Theiner (NCUEI) ai 29 de fauré tratà details sun n cuntribut de ublianza per l marketing turistich. Nchin de merz uelen abiné na vijion deberieda per purté d’auril la pruposta de lege te Cunsëi provinziel.
L ie mo debujën de stlarimënc per la realisazion dl cuntribut per l marketing turistich sciche se ova tëut dant la Jonta provinziela. La se trata de doi tribuc, un unissa ciarià su ai turisć, l auter ai ciamps economics che prufitea dl turism. Cun chisc ulëssen seguré l finanziamënt dl’atività per l turism. L cuntribut per l marketing dëssa unì mpede i cuntribuc ulenteres per l marketing turistich, a chësta maniera unissa l custimënt spartì a na maniera plu valiva.
Per stlarì la realisazion pratica di doi tribuc, iel unì nvià reprejentanc dl’economia tl Palaz Widmann a Bulsan. A chësta maniera an nvià via cunsultazions che unirà mo purtedes inant ntan la proscima enes. Nchin ala fin de merz se an tëut dant de ruvé a una per pudëi prejenté d’auril na pruposta te Cunsëi provinziel.
La dificulteies ne cumporta nia tan la cheder de lege, ma plu che auter l’urdenanzes de atuazion che unissa fates sun la basa dla lege. “Bele tla lege uelen mëter ite duc i details per i doi tribuc, nfati nce l’atuazion” à dit l assessëur al turism Hans Berger. Purempò muessen bele sën avëi la ideies tleres a na maniera da pudëi avisé la lege dl drë vieres.
L assessëur cunsieia al’ativiteies turistiches de calculé l tribut da pert di turisć canche i fej cuntrac cun agenzies. “Sce l ne vën nia fat nscila, ti toma l pëis sun l hotelier” dij Berger. I cuntrac cun chësta agenzies dëssa perchël udëi dant na tlausula che tën cont dl tribut di turisć, y che l possa mo unì batù su sun l priesc. Tant che fajerà ora chësc tribut per i turisć ne ie mo nia fat ora, ma bonamënter saral aldò dl assessëur danter 0,50 y 2 euro per nuet, per i turisć sëura 14 ani.
as
