Jonta provinziela: sënta IPES, bilanz y tofles
USP – Te si senteda da (NCUEI) ai 05 de merz à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce la sënta per l IPES, l bilanz provinziel y l’autorisazion per tofles y scrites.
Sënta IPES
Mpede cumpré na strutura per fé na sënta nueva dl Istitut per cuatieres soziei IPES, uniral ngrandì una dla sëntes che ie bele. De plu cuncorsc per cumpré na strutura adateda fova jic ala nia. La Jonta provinziela à śën tëut la dezijion de ngrandì la sënta tla streda Milano a na maniera che duc i ufizies ebe lech iló y ne sibe nia plu spartì ora per la zità de Bulsan. “A chësta maniera pudons sparanië feter 10 milion de euro” à dit Luis Durnwalder. Aldò dla vedla idea fossa na sënta nueva unì a custé feter 20 milion de euro.
Bilanz 2013
L bilanz dl proscimo ann sarà bonamënter sot a i cin miliarc de euro. Chësc prim pronostich à fat la Jonta provinziela tenian cont dla situazion atuela. Dant iel mo da udëi tan inant che n ruva tla tratatives cun Roma n cont di paiamënc per judé a ressané la cassa dl Stat.
Per l bilanz 2012 muessel unì fermà 5% de duta la spëises (ora de chëles de ublianza) per pudëi garantì l pat de stabilità. Chësc ie debujen per prugramé l sparani y nia l lascé pesé sun i ciamps che vën paiei ora ala fin dl ann. L fermé de chisc 5% pudëssa nce unì lascià vester sce da Roma unissa la comunicazion aldò. I assessëures provinziei à dat pro co che dëssa unì sparanià chësta somes. L sparani ne dëssa nia unì fat categuricamënter sun uni repartizion, ma per departimënt. L possa a chësta maniera unì dat prioriteies y laurà cun na cërta flessibilità tenian cont de sparanië 5% tla soma de dut l departimënt.
Cumpetënza ai Chemuns per la tofles
Tofles y scrites ne ie nia plu cumpetënza dla Provinzia, ma di chemuns. Aldò dla Jonta provinziela dëssel unì desferenzià aldò dl tëmp che resta chësta tofles. Sce l se trata de placac o scrites che resta al plu 30 dis, ne iel nia debujën de n’autorisazion aministrativa, ma me dl patron dl grunt. Sce l se trata de tofles che resta plu giut, muessel unì damandà n’autorisazion dl’ambolt.
as
