Manutenziun sön les strades dles valades ladines
USP - I punc prinzipai dla manutenziun dles strades reverda en chësc ann l’asfalt y le dortoré i mürs de sostëgn. La Junta provinziala à aprovè le program por le 2012 che vëiga danfora na spëisa de 43 miliuns. Ince tles valades ladines él preodü de plü laûrs.
Danter Badia y Corvara él odü danfora laûrs de ressanamënt di mürs y tlandri de strada por d’aisciöda. Sön na lunghëza de dui chilometri gnaràl fat laûrs por 240.000 euro.
Tla fasa de proietaziun él laûrs che reverda costruziuns por che al ne vëgnes nia jö roes y peres a Badia y S. Martin. Chisc laûrs n’é nia ćiamò gnüs scrić fora y al é preodü n cost de 242.000 euro. Pro i laûrs ćiamò da scrì fora él mürs y tlandri de strada sön la strada dla Val Badia al’altëza de S. Laorënz.
Le Sorvisc provinzial Strades por le raiun de Puster à odü danfora de plü laûrs che reverda l’asfaltè. Danterater gnaràl fat danü tòć danter Corvara y Frara, y da Longega a Corvara. Por le 2012 él inće odü danfora da asfaltè danü a S. Martin de Tor, Mareo y S.Laorënz.
“Anfat sce al se trata de asfalt, mürs o d’atri intervënć, i ćiarun da lascè fà chisc laûrs da firmes da chilò” dij l’assessur Florian Mussner. Ël ti â fat la proposta ala Junta provinziala da fà investimënć por 43 miliuns de euro por mantignì les strades y la segurëza de chi che les les adora.
Por la pert ladina che reverda le Sorvisc dles strades Salten-Scilier él programè da mëte al sigü le rogn, olache al manacia da gnì jö na roa pro la strada de Gherdëna, al altëza de Laiun. Al è preodü n cost de 170.000 euro. De setëmber él preodü da avalié y slarié fora val’ tòch dla strada dl Ju de Sela por 100.000 euro.
as
